近日颱風「飛燕」吹襲日本，四國同近畿地區都傳出災情，關西機場亦都因運油船衝突，導致大橋斷開！
日本有報道指一架巨型運油船，落貨後停泊喺港口附近。
但因為惡劣天氣，成架船都被海浪捲走，失控撞向日本關西機場連接大阪泉佐野市嘅大橋。
呢條橋係機場唯一對外連接的道路，滯留喺機場內大概3000位旅客同工作人員，就搭船轉送到神戶機場。
現時(9月5日)有關當局都未有最新消息，指幾時可以恢復工常運作。
關西國際機場一日有7萬人次使用，今次損毀有可能導致一段長時間停用。
今次嘅強風，亦都令關西機場部分設施嚴重水浸，
從上圖可見，機場跑道都被洪水淹沒！機場內部分地區甚至停電，手提電話服務亦都被中斷。
除咗大阪機場，京都嘅車站同名勝，都抵受唔到今次強風嘅吹襲！
好似平野神社咁，有十幾棵櫻花樹被吹倒，由江戶時代就有嘅古蹟拜殿亦都倒塌。
平野神社係京都好出名嘅賞櫻名所！今次風災真係令到神社損毀好嚴重。
暫時都唔會開放比公眾參觀。
而同樣係人氣景點嘅嵐山渡月橋，都有欄杆被「飛燕」吹倒。
京都車站更加有天花板跌落嚟！
目前風勢雖然已減弱，
但呢次風災帶嚟嘅破壞，相信都要一排先可以恢復好。
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0