日本琵琶湖 - 用電動單車逍遙於琵琶湖吧!【北陸之行8】 | 鋒加西亞 - 德國工作假期後的世界流浪

琵琶湖係日本no.1大湖，位於中部滋賀縣，大約係京都旁邊，JR都只係兩個幾鐘，非常之適合望下山望下海one day旅行~

但係，睇襯d遊記講都係環湖一周，真係好恐怖!
唔係做唔到，我都想咁玩呀，只不過唔係個個都有咁多時間同咁多體力ga嗎!

想one day trip快速盡睇琵琶湖美景，最好方法，似乎都係用電動單車踩一小個分段~

聽聞湖既北方岸線，即JR余吳駅至近江中庄駅一段風景係最靚的，就睇下係咪傳聞中一樣咁強勁啦!

(即係呢段，呢個都係我既原定路線)

琵琶湖既單車配套非常完善~

幾乎沿湖每個JR駅既information centre都有單車及電動單車租借，時間大約係09:00-17:00

價格分別係500yen及1000yen，到其他駅還車則再加300/500yen，計落都係同香港差不多價，ok ar~
如果係環湖既旅人，琵琶湖好多旅館都可以幫妳送行李到下一站落腳地，但好似我咁去程同回程不同地方既，最好都係超輕裝上陣好d

(以上係網上搵來的資料)

睇返個租車時間，再考慮埋今日已經係旅程第6日兼晨早起身，體力都係唔多夠ga啦，所以行程再縮減為永原駅至マキノ駅，踩左據說靚中之靚既東山半島海津大崎一段先，之後再按情況同時間睇下去邊玩~傳聞果段路有櫻花睇ga!!!

「海津大崎因為前幾日打風山泥傾瀉封左呀」
Ar…………….點解d類似語氣咁熟口面ge…………
係啦…………係鐘釣溫泉封左果陣……係叮噹列車停駛果陣…..係藤子F不二雄美術館無開果陣……仲有係溫泉旅館無野食果陣……都總有位人兄會同我講呢番說話……..
計埋「雨晴海岸睇唔到立山連峰」同「兼六園暴雨龍捲風」，我幾乎每日都運滯唔止一次，呢d黑仔野係呢個北陸之行系列究竟仲要出現幾多次呀!!!!!!????
係唔會有，因為今篇已經係北陸之行既最後一章………..
唉咁冧山泥又真係無計ga，唔通踩出湖面咩……….
唯有聽車站職員姨姨建議，踩左相反方向既「奥琵琶湖パークウェイ」(奥琵琶湖parkway) 大浦漁港至菅浦漁港一段先啦

(原定路線)

(而家踩左呢段先)

點都好，出發啦!

踩左唔夠兩分鐘已經比四周廣闊既田野景色吸引~
Woo真係無揀錯今日嚟踩單車!!
好好天呀!!!~~~~~

再踩多5分鐘………奇怪啦，睇地圖永原站同湖邊只係10分鐘步行距離，以電動車既速度，無理由咁耐都未見到水ga wor?

開返慢到嘔既GPS望一望 -------- 個湖係南邊，但我一路向北緊……….
阿租車姨姨又話出門左轉………佢係咪卓洛嚟 ga………..

(完全去左反方向………..)

好彩電動車速度夠快，轉眼間穿過綠草農田 -------- 係大海呀!!!!!!!!!!!!!!!!!
痴線! 湖嚟 ga!!! 但望住一大片汪洋似既物體就係要咁叫嗎~
好靚呀!!!!!!!!

沿國道513「奥琵琶湖パークウェイ」前進，會到達第一個景點「赤崎丸子船」

其實都只係一隻木製的船狀物體，同馬灣隻方舟一樣係得個名落唔到水ge，不過呢處卻有一個小坡比你親身掂下琵琶湖既湖水
woo 使唔使咁清澈呀！好想跳落去游返廿個直池呀！！

第二個景點係……….無ge~
使鬼咩~~~~~~沿路d風景鬼火咁靚，慢慢enjoy下在乎山水之間好過啦~

電動單車不停步前行約40分鐘，會見到湖邊小村落「菅浦漁港」

係時候食個靚飯啦~~~ ee 前面好似寫住有鴨肉料理食wor~
「本日休業」。。。。。。。。
……………………….
我已經唔想再吐糟係今個trip既第幾次摸門釘了………

唔緊要，去村內求其揾d野食啦
無wor………………
5分鐘高速環遊左菅浦漁港一個圈…….
真係無wor………………
就好似上次我係坂手島，除左住宅真係乜x都無wor………
可以點? 咪原路踩40分鐘返大浦漁港睇下有無餐廳開law……

結果點? 咪維持原判真係乜x都無law……..

even海津大崎封左，都想踩一段仔來回感受下傳聞中的超靚風景ge~
但衡量下體力……….唔祭左五臟廟就要祭自己ga la wor…….
唯有直接走路牌上既新路，睇下路上有咩餐廳啦
Ee又真係有wor~~~~~~

唔意外呀~~~~準備中=無野食，我已經開始接受自己黑仔既命運了
踩左4個鐘個肚仍然絕對空虛，就嚟暈ga la…….

好彩都唔係毫無收鑊，準備中既店主話沿國道303向西直踩上山過埋隧道，應該有間食肆係仲開緊的~

哦~~~~~馬路呀~~~3.5公里呀~~~~上山呀~~~~~無問題~~~都係體力既問題je~~~~
但我而家無體力呀!!!!!!就算係電動單車都會攰ga!!!!!!!
隧道內條路仲要無圍欄，d貨櫃車係旁邊頭搖又尾擺，我就嚇到成身濕哂啦……..

出左隧道不遠，就見右前方有一漆上港女最鐘意的夢幻藍色的貨櫃小屋，上面寫住「青空食堂」

真係有開門有野食呀!!!!!!!!!!!!!!
渣渣臨叫個飽肚孖寶親子飯+奄列飯先啦!
Ee估唔到呢間山中小店既食品價格又非常親民wor!

白色簡約裝修，乾淨兼整潔有序，話係文青café都有人信，點會估到係for貨車大隻佬既中途休息站呀

店內只有一位老人家，煮又係佢洗又係佢總之乜都係佢，都無得except上菜速度會快啦
但每一樣食物都係呢位老伯伯新鮮即切即煮，用心機出慢工細貨
係超極級餓，不過睇住老伯伯果種專注，就覺等待都係值得的~
果然!

炸雞甘香酥脆、奄列飯樸實而美味，親子丼阿哥更話係居日本多年食過最好味的!

或者肚餓真係最好的調味料，但無改呢間家的感覺小店的溫馨滋味
老闆見我地食得咁開心，笑住話想搵多d叫我地幫佢宣傳下~
無問題呀~不過我擔心佢做唔切多d~

吃飽喝足，心滿意足，係時候繼續，向著名景點メタセコイア並木出發啦~

經過岩岩果一大段上山路，而家國道161呢段直衝3公里大斜路好爽呀!!!!

I am the king of the world左1.5公里來到「小荒原」紅綠燈口時，見到燈柱有個細牌仔寫住「メタセコイア並木呢邊」，係右手邊的一條鄉村小路

但睇google map，正路應該係落返マキノ駅再北上，路牌呢個方向我真係唔知中途有d乜，萬一又係上山咪大檸樂??
下意識係「唔好搏!」，但轉念後既係「有得探險wor!」於是同阿哥一野就轉右，向地圖上的荒蕪地帶進發!
我果然係一個好唔安全既男人呀~~~~

不到5分鐘，我就知道呢一個選擇，係我整個北陸之行中，最正確的決定

好靚呀!!!!!!!!

我無諗過平凡鄉村既風景可以咁靚ga!!!!!!

左右均是一大片廣闊的田野，填滿了不同層次的青綠，我們風馳穿梭於其中，一瞬間暫竊了農民那樸實而純真的生活，更彷似置身於宮崎駿龍貓的鄉村世界~

轉過山谷，一陣豁然開朗，小溪流水，在一片青蔥翠綠中沙沙作響 ; 微風輕拂，細葉彎彎，漸黃的日色傾於芒草之上，發出半透的閃亮金光

亳無疑問，這是今次旅行最美麗的一幀風景

(呢張用左少少味精，但效果真係靚左好多，仲貼近返我現場所見，所以已成為我呢個trip最有代表性既相~)

無錯，今日係黑仔，但如果唔係封路改道，真係一世都無可能踏上呢條地圖沒有的秘密田野單車徑
柳暗花明又一村，有d野，真係整定的~

繼續沿路向前，終於見到メタセコイア並木啦!!

網上睇到好多相，都係秋黃時節或銀白雪景的兩行參天並木，詩意滿溢
我就無咁好彩了，到達時又多雲又多車，個天灰灰暗暗咁，另加唔識影相，真係乜野feel都無ar………

其實整個メタセコイア並木全長約2.5公里，上面d相既係最北端，越往南方樹的密度則越高
岩岩d相無咩睇，可幸向南走多一陣就太陽出來了~

在樹林間的光影交纏中，終於感受到呢堆並木係幾咁優美啦!
並木優，果然名不虛傳!

穿過メタセコイア並木，距離還車時間只剩低半個鐘
都無咩特別地地方好去了，繼續沿287大路一直衝返去湖邊，再橫cut去個名好乜長既Makino Sunny Beach Chinaihama Auto Camping Ground (マキノサニービーチ知内浜オートキャンプ場) 同”マキノ湖のテラス”
我只能夠講，唔使咩特別景點，普通藍天白雲+透徹湖水已經靚到不得了~