以前的港產片，尤其星爺演出那些經典，真係有好多金句，加上電視成日重播，電影台又長期可翻睇，fans直情識背。《新喜劇之王》就快上映，不過我知大家都係懷念經典那一套。到底有幾多金句出自元祖《喜劇之王》大家又會成日講？其實有一句，我成日搞亂以為來自《喜劇之王》，其實係來自《少林足球》：「做人如果冇夢想，同鹹魚有咩分別？」我知，有冇人同我一樣？
「精神啲！臨時演員都係演員。」冇人會唔記得啦？連《新喜劇之王》宣傳，星爺都要講番呢句。
「屎，你係一篤屎。」其實係首歌，當年有冇人咁樣鬧過人？
「你條死茄喱啡！」未必會咁鬧人，但那些年當你被鬧死肥仔、死XX時，可能你會回應：「可唔可以唔好加個『死』字？」
「我係送外賣o架咋。」每次見到茶餐廳餐牌有得加底，都會諗起外賣仔；每次有人送外賣嚟，我都想指住佢個頭講：「你唔係外賣仔！」
「由外到內再到返外。」田雞被踩扁腳，《新喜劇之王》都有呢個場面。
「我真心o架！」呢句好實用，但請配合眼泛淚光表情。
「唔返工你養我呀？」當有人叫你今日射波時，你可以學柳飄飄回佢一句。
「你養掂你自己先啦，傻仔。」拒絕別人求婚必用，絕情絕義。
「你都係扯吧啦。」實用性極高，絕對能夠表達出嗰種不滿同無奈。
「俾啲火我。」有冇人認真同你講過呢句？其實你可以學甜筒輝回佢：「我想返屋企呀。」
「我要初戀呀。」有邊個唔想搵番初戀嘅感覺？尤其當你離初戀越嚟越遠。
「你唔做舞女我邊有錢，我冇錢點養你呀？」無賴到極致嘅表現，亦係無賴幻想中成日想講嘅對白，但苦無對象，或者唔夠膽。
「我一世英名, 比你鍚到一面口水。」林子善洪爺同已故演員侯煥玲演嘅一場戲。
「一百幾廿萬至一千幾百萬不等。」尹天仇打電話問洪爺「極品級數」嘅夜總會小姐過一晚夜要幾多錢，打開冷知識領域。