前年MIRROR紅館演唱會發生意外後，舞蹈員李啟言（阿Mo）嚴重受傷，So Ching（蘇芷晴）無微不至地照顧男友，後來更退出女團COLLAR淡出幕前。去年So Ching再做跳舞導師，推出翻唱歌並開設個人YouTube頻道，今日（12日）她更接受「9BoThew膠保廢」YouTube頻道訪問，罕談近況及心情，直言「時間會沖淡一切」。
So Ching在節目中大晒廚藝及談及近況，近日她一直教跳舞班，並透露正準備參加一個國際性跳舞比賽World of Dance，全球不同地區都有舉行比賽，冠軍更有望到美國交流。當主持問到So Ching可能要到美國發展，她即表示：「會返嚟㗎嘛！」主持則笑指她：「即係佢去硬。」So Ching隨即開懷大笑，又表示會繼續拍YouTube片。
大家非常關心So Ching與男友阿Mo的近況，被問到如何走出阿Mo重傷陰霾，她表示：「主要都係因為時間……好老套咁講，時間可以沖淡一切。因為我以前唔信㗎，以前聽就會覺得『你實咁講㗎啦』，但原來基於呢件事嚟睇，都幾套用到。」對於網民的不同聲音，So Ching從不理會：「老實講我係從來冇睇，即係除非真係彈到埋嚟囉，因為我冇開任何通知，冇咩必要都唔會撳嚟睇。有啲留言無論好定壞都會觸發到我情緒，但我想自己穩定啲。」
So Ching坦言，在情緒管理上仍有不好的情緒，但越來越難影響到心理，因為她自覺生活焦點已有所不同。回望過去兩年，她表示：「我覺得話好似發咗場夢好貼切，最大轉變係我個人慢返少少囉！一直都係個好心急嘅人，唔係好諗嘢㗎，簡單啲嚟講即係冇乜用腦。但上年年中打後開始，搵返自己生活節奏，就慢慢知道其實自己係點生活先比較好。」她亦深深認同受男友意外影響，令她急速成長。
