【鐵探】「營長」吳廷燁棄豪宅搬回公屋全力照顧年邁母

近日無綫熱播劇集《鐵探》，除咗有金像影后惠英紅神級演技搶fo，36年後再回歸TVB演犯罪集團主腦「營長」的吳廷燁，同樣引起網民熱話，甫出場已經殺氣逼人震懾人心，但現實生活的他卻是個暖男兼孝順仔，更令人意想不到的是，58歲吳廷燁甘為照顧93歲年邁母親，放棄拍拖約女，由住開的半山豪宅搬返黃大仙狹窄公屋，還拒請工人，堅持一日三餐以至家務日常都一腳踢，事事親力親為唔怕困身，就連同老死梁朝偉約會都冇時間，全力侍母大過天，其他人惟有靠邊站！

撰文：東方新地圖片：新傳媒圖片、Instagram、微博

吳廷燁放棄單身自由

同梁朝偉是同屆無綫藝訓班畢業兼係老死的吳廷燁，去年被本刊踢爆棄住半山豪宅，搬返黃大仙鳳德邨公屋居住，原來大屋搬細屋全為照顧93 歲高齡阿媽，由於吳母年事已高兼有白內障，日常起居需人照顧，乖仔吳廷燁決定放棄單身自由，回家擔起重責。據知情者透露：「唔撈亞視之後，壽仔（吳廷燁）有段時間去咗內地發展，工作可以話長做長有，都少咗返嚟香港，不過，之前佢媽咪心臟出問題住咗一排醫院，壽仔即刻停晒內地工作撲返香港，阿媽出院之後，為咗照顧老人家，佢仲放棄住開嘅半山豪宅，搬返去黃大仙公屋陪阿媽住，本來有諗過接阿媽搬去自己屋企住，不過老人家住咗嗰度幾十年，所有街坊同鄰居都熟晒，佢怕阿媽適應唔到新環境，最後都打消念頭，寧願遷就老人家，自己搬返公屋。」

拒請工人照料起居

以往絕少入廚的他，要照顧高齡阿媽一日三餐食得健康一點不容易，雖然有朋友建議他大可送阿媽去老人院或請工人照顧，但他終究唔放心，再辛苦都堅持自己親力親為。據知情者透露：「佢阿哥同家姐都結咗婚有自己家庭，壽仔單身寡佬，同阿媽住可以方便照應，始終人大咗好珍惜同家人相處嘅時間，佢話以前細個唔識諗，成日都掛住玩忽略咗阿媽，反而阿媽對佢呢個孻仔就錫到燶，成日都好緊張佢喺外邊夠唔夠湯水飲，會叫佢返屋企食飯，乜都就晒佢，依家諗番都好內疚，所以佢好想趁自己仲有能力，辛苦啲都要照顧番老人家，佢仲拒請工人，一來怕阿媽未必同外人相處到，又怕工人唔夠細心，依家佢一得閒就會陪媽咪落街散步，去行超市當運動，家陣佢連買餸都好熟行，一日三餐絕對難唔到佢，仲成日會諗啲啱老人家食嘅食譜，真係好孝順！」

82年加入第十一期無綫藝員訓練班認識，吳廷燁跟梁朝偉相交三十多年感情深厚，不時會相約飯敍及行街，早年就被拍到結伴逛金鐘太古廣場。

冇時間約女

照顧阿媽大過天，快奔六的吳廷燁即使仍單身寡佬一樣唔心急拍拖。據知情者透露：「佢成日都話拍拖嘅嘢一切隨緣，但其實約女仔都要時間，依家每日佢都要照顧好阿媽三餐行先，非必要佢都唔會出街，有嘢做就要搵家姐幫忙，有時佢出街耐啲都唔放心，要拜託鄰居幫吓眼，咁嘅情況，佢又點會花時間去約女仔呀！」就連跟他傳過緋聞，至今仍以好朋友相稱的張文慈，亦坦言試過約他被拒：「有時打畀佢，佢話啱啱煮緊飯唔得閒，都唔肯出嚟，我知佢好緊張照顧佢媽咪！」

搬返公屋住的吳廷燁，生活亦變得樸素，未有再揸車的他，當日由TVB租用的七人車接載，工作亦沒有助手跟身，做完嘢自己攞住替換的服裝返屋企。

偉仔請唔郁

緋聞女友請唔郁，就連老死梁朝偉一樣冇面畀。吳廷燁跟偉仔同是無綫第十一期藝訓班學員，兩人相交三十多年感情深厚，有指當年事業遇上樽頸位，梁朝偉更落力引薦好友拍電影，令吳廷燁有唔少演出大片機會，患難兄弟情義盡在不言中。據知情者透露：「壽仔同偉仔喺訓練班時已經好啱傾，經常約埋出去玩，雖然之後佢兩個共事嘅機會唔多，但就感情深厚，成日會約出嚟飲紅酒傾心事，就算偉仔事業爆紅仲結埋婚，關係都冇變過，不過自從壽仔要照顧媽咪，都冇乜時間約老死出嚟玩，上年偉仔約滿王家衛，大部分時間去旅行享受生活，都試過想約埋死黨一齊出埠玩，但壽仔為咗照顧阿媽，連偉仔都拒絕！」

為照顧阿媽，吳廷燁由昔日租住的半山豪宅，搬返黃大仙鳳德邨公屋，而每次出入他都刻意行後門兼戴口罩，唔想畀街坊認到。

吳廷燁有感請工人唔及自己細心，寧願煮飯家務一腳踢，買餸亦專揀啱老人家胃口及易咀嚼如豆腐的食物，堪稱廿四孝好仔！

近日熱播的《鐵探》，原來吳廷燁亦一度怕分心想過唔接。據知情者透露：「依家太困身嘅工作佢都唔會接，返內地工作更加唔使諗，最初佢都冇諗過拍《鐵探》，驚拍劇會疏忽咗媽咪，後尾因為編劇好有誠意不停約佢出嚟傾，睇咗劇本佢又好鍾意，最後先接！」百善孝為先，今時今日肯將阿媽當女朋友咁服侍周到，唔係極品都好難做得到！