【獨家】41歲陳展鵬娶28歲單文柔 新娘登船開party攬實老公

41歲視帝陳展鵬今日同28歲嘅港姐單文柔共諧連理，新郎今朝7點幾就到中環四季酒店準備接新娘，着住中式禮服嘅展鵬喺兄弟陪同下，成功接咗新娘，着紅色高衩旗袍嘅單文柔撓實展鵬臂灣步出大堂，佢哋都笑不攏嘴。

一對新人應記者要求企定定影相，但就未有停步做訪問，可能趕時間，新郎同新娘上車，兄弟姊妹就坐另一架24座van跟着花車到中環9號碼頭駛去，花車經過中環摩天輪都有停低拍片同影相，展鵬好細心為老婆開車門。

當影完相，佢哋又向下一站出發，原來展鵬安排親友登上一首遊艇出海開P，現場所見，工作人員拎住一啲膠波物體同大堆道具上船，估計係用嚟玩遊戲，遊艇上早有布置，船頭有花，親友也一早登船坐在船艙，展鵬扶實着高踩鞋嘅文柔上船，因為有浪，單文柔都搖一搖，佢企唔穩攬實老公，兩人相對一笑。單文柔嘅高衩旗袍大風吹起，差點春光乍洩，幸好佢眼明手快按着，只係騷出白滑長腿，親友見一對新人步入船艙即歡呼喝采。當大家都登船，遊艇隨即隨向維港方向駛去。

精選娛聞，喺晒《娛果》
http://fb.com/appledailyen