短髮90後談善言，2012年憑《點五步》初任女主角引人關注，從模特兒界轉戰電影圈。短短7年再殺入電視圈，跟惠英紅、鄧萃雯、姜酷文和陳錦鴻等好戲之人合作，機會確實難得。演藝事業一帆風順，但原來她曾被人批評話唔適合做演員！作為影視圈新貴，阿談又如何證明自己的實力？
硬朗內向、不愛交際，成別人質疑演戲能力的理由！
今時今日要在影視圈闖出一片天並不易，尤其新一代，要不憑女神形象突圍，要不以演技見真章，後者當然難上加難。談善言自言「深知自己唔係女神」，拍住金像獎級對手及前輩演戲，壓力都好大：「跟紅姐拍《心冤》做對手戲，佢嘅氣場好強，加上要對住影后，真係令我好緊張。」
▲《心冤》劇照，惠英紅飾演madam，盤問談善言飾演的富家女羅天儀，自編自導自演整場綁架案，故有不少對手戲。
▲《婚內情》劇照
到《婚內情》對住雯女亦如是：「如妃娘娘喎，氣勢一樣好震懾，而且佢要求都好高。」
壓力雖大，但阿談從不向外流露軟弱一面：「我好在乎其他人點睇我，因為好勝、要面子。即使同人呻完都會充滿負能量，件事又未必解決到，不如自己嚟。」
可是，當任何事都藏在心裡，就成為了別人批評的理由。
「因為我表達能力唔強，比較鍾意收埋自己，又唔夠social，所以都好多人話我唔適合做演員！到底我喺呢行能唔能夠生存，都係一個問題。」以上種種，都令阿談一度迷失方向，不肯定要否繼續行演員這條路。
不甘被定型、被輕視，為角色去到盡！
幸運地，每個前輩們會視乎阿談的表現去迎合角色，令她學會揣摩角色情感、享受跟對手的火花。她也開始學習了解自己：「我唔鍾意表達情感，唔代表我唔識。只要肯練習，就一定有改善。朋友都話我呢一兩年唔同咗好多，因為我開始了解自己開心、唔開心嘅原因，內心深處都蘊釀唔同嘅情緒，再學習搵方法去釋放，做戲時就能夠更投入角色。」
另一邊廂，她為角色去到盡，在《告別之前》剃光頭演癌症病人只是小兒科，《非分熟女》演索爆pole dancer才是最大挑戰：「當我第一次fitting時都好有障礙，我到底可唔可以好有自信咁著住呢套衫呢？因為大家對我都無幻想，我冇女人嘅婀娜多姿。」
為了證明自己的實力，阿談為《非分熟女》努力修身練肌肉，又自費惡補鋼管舞。大家看見熒幕前的談善言，舉手投足散發出自信、專業和女人味，卻不知道她背後的辛酸：「當時時間無多，而我學識嘅連一半都未到，嗰刻好想喊，眼淚就滴落嚟。有一刻真係以為要同導演講用替身。」
但因為當初casting 時跟導演承諾過一句話：「我唔識跳pole dance，但我可以學。」令阿談堅持下去，最後幸得導師額外花時間指導，令她成功過關，最後確實令觀眾眼前一亮。經過今次，阿談對自己又多了一份信心和肯定：「每個角色都令我更確立要走演員這條路。」
是死𡃁仔，也是小女人！
短髮，中性、高冷，是談善言的代表詞，阿談都話自己好死𡃁仔，好粗魯，平時打扮好隨性，以素色舒服衣著為主，但她也愛被讚有女人味：「依家頭髮長度啱啱好，俾人話多咗女人味，好開心！」
而她私下對住另一半也是個小女人：「我係外強中乾，對住佢會變小朋友，想依賴，想被照顧，變得好柔弱。」
阿談口中的「他」，現空缺中。雖然將近30之齡，她卻不渴望結婚：「中學時跟初戀男友拍了6年拖，當時對我們的將來都好有信心，會好想結婚。到人大了，環境轉變，大家都變得不同，當初對愛情的肯定變得不確定，才發現原來很多事都會變。結婚只係靠一張紙去證明婚姻關係，我唔相信一張紙可以維繫感情，所以冇太大必要結婚。」
拍過3次拖，對愛情變得理性的阿談如今不太渴望戀愛，選擇被動地等待真愛：「現階段對方想approach 我會好辛苦，佢可能要踢好多下，除非對方好努力令我相信愛情，令我沒有顧累去愛。」
既是宅女 也跳跳紮愛刺激！
沒有愛情滋潤，阿談不怕做宅女，愛宅在家煮飯、看漫畫；但愛挑戰與死𡃁仔的個性依然不減：「早排去咗學潛水，覺得水底好靜好舒服，要集中精神去感受，之後都想學衝浪！」一時怕悶愛新鮮，一時又愛做宅女，連她自己都話：「好矛盾呀可？」大概這就是真正的談善言。
Credit：
Photos by Keith; IG @tamsyin
Styling by Sandy; assisted by Yuki Chu
Makeup by Meegan @ Bridal Corner
Hair by Larry Ho @ IL COLPO
Wardrobe from Chloe, Isabel Marant, 3.1 Phillip Lim, House of Holland (net-a-porter)
Shoes from Celine, Sergio Rossi, Malone Souliers
Accessories from APM Monaco
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
留言 0