余德丞被指偷食人妻同事Elsie　發嚴正聲明：指鹿為馬誤導讀者

余德丞（Dickson）於兩年前與TVB結束8年賓主關係，目前在商台擔任《口水多過浪花》夥拍鄭裕玲、余迪偉和傑朱擔任主持。日前，余德丞被影到與人妻DJ同事Elsie（呂珮琳）同行，Elsie在IG story轉載有關圖片並笑指胞妹都懷疑她出軌，之後余德丞再轉載並tag了Elsie老公Agent L及阿正，表示「#真係無拖手。」

余德丞昨日（7月11日）在節目《口水多過浪花》急急澄清事件。拍檔傑朱和鄭裕玲（Do姐）笑指他跟Elsie在相中的距離像「拳頭咁近」，而Do姐鄭裕玲更抽吳若希水，搞笑說：「人哋老公會寫『你趷起條尾都知你想點』。」余德丞解釋當時其實阿正都在場，又指幸好與Elsie老公Agent L.是老友：「當晚我同Elsie、阿正錄完音，跟住去攞車等過馬路，好衰唔衰我有180cm高，阿正生得矮又企我後面，所以我遮住咗佢得番四分一面，佢又戴帽及戴口罩，冇人知嗰個係阿正。當時彌敦道有啲嘈，我應該係想聽Elsie講咩，所以哄埋啲，我哋係同事兼朋友，我絕對冇介入人哋婚事。」

昨晚有傳媒以「余德丞約人妻同事被誤會急澄清」作報道，余德丞今早在IG發嚴正聲明否認，指報道「指鹿為馬、誤導讀者」。「嚴正聲明：本人明白娛樂報道難免使用誇張標題吸引讀者眼球，但並不代表可以指鹿為馬，誤導讀者！既然標題引用鄭裕玲小姐於商業電台「口水多過浪花」節目內對話，足以證明撰文者並非單純看圖說故事，而是已經收聽有關內容。」

「本人已於7月11日的「口水多過浪花」節目內解釋事件來龍去脈，相信收聽後並不會存在“偷食人妻同事“的疑惑，所以該報道的標題絕對是失實及故意誣蔑。輿論的影響力相信大家都明白，而是次事件牽連到本人朋友，實在不可容忍。謹此希望傳媒工作者能謹守專業操守，為自己的文字負責，不要因為刷流量而影響他人及行業明聲。最後多謝收聽口水多過浪花！#直斥其非 #謝絕標題黨」。