Disney+彷效Netflix打擊寄生帳號 美國地區連續三年加價

我有一個好消息同一個壞消息要同大家分享，好消息就係Disney+又要加價啦，而香港地區就可以避過一劫，加價只限美國地區啫。而壞消息就係，大家就嚟冇得再做Disney+寄生蟲啦，因為Disney+準備要採取行動打擊寄生帳號啦！

迪士尼總裁Bob Iger近日喺財報電話會議表示即將會展開打擊寄生帳號嘅行動，預計喺9月開始全面嚴格執行，亦即係香港嘅用戶最遲喺9月受到限制。其實喺今年4月，Bob Iger就已經講過預計會喺6月先針對少數市場嘅訂閱用戶，開始實施共享帳號嘅新政策，如果唔係住埋一齊，而又共享同一個密碼嘅話，就有可能會出現有人登入唔到嘅情況。

另外，Disney+亦宣佈10月17起，Disney+、Hulu、ESPN嘅訂閱月費同年費都會全面加價。今次已經係美國Disney+喺唔到兩年嘅時間加第三次價，Disney+今次加價仲一加加成25%，比起2019年Disney+推出嘅時候價錢已經直接翻倍。不過可能就因為呢啲政策，Disney+終於迎來首次轉虧為盈。香港嘅同仁就未洗擔心住，暫時未有消息香港亦會加價。

又加價又打擊寄生帳號，但Bob Iger依然充滿信心，佢表示Disney+將會計劃唔同嘅播放清單同引入ABC新聞直播，所以唔擔心會流失訂閱用戶。

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/