中國現時經濟麻麻，人所共知，兩大問題，債務水準同埋消費降級，更係牛頭角順嫂都識講，但問題有幾嚴重呢？會唔會同我哋認知出現偏差？
首先研究大陸經濟數據，最大問題係各個部門都有唔同口徑，條條數都有啲唔同，所以每粒數都盡量講來源。先講地方政府債，根據財務部數據，截至2024年11月末，全國地方政府債務餘額46.5萬億人民幣，按年增加14.5%；同為財部數據，截至2024年9月末，中央政府債務餘額33.5萬億人民幣，按年增加18.4%。估計去到2024年11月中央加地方政府債務規模約80萬億人民幣，以大陸2024年頭3季GDP總額95萬億計，單純政府債務佔GDP比率，約為84.2%。
如果以IMF喺2024年11月數據，中國政府債務佔GDP約90%去睇，橫向比較日本(251%)、新加坡(175%)、美國(121%)、法國(112%)，似乎未算太過分。但根據CEIC Data最新數字，2024年10月大陸家庭債務達11.5萬億美元，圍返約84.6億人民幣。又根據萬德數據，頭十大香港上市負債總額最多內房，喺最新一期財報負債總額8.4萬億。當然呢個數並唔準確，因為會包括好多會計上定義為負債，但其實唔算負債項目，但反正只計了香港十間上市內房，又未計A股上市嗰啲，又未計其他企業，所以只係當做基本參考。
如果齋咁計，大陸總負債對GDP比率已經達到182.1%，但呢個計算已經係非常樂觀，因為國家金融與發展實驗室發佈2024年三季度宏觀杠杆率資料顯示，今年三季度末的宏觀杠杆率從二季度末的295.6%上升至298.1%，增幅為2.5個百分點，前三季度共上升了10.1個百分點。即係接近你生產100蚊，但你負債係300蚊。
早排睇大陸啲市民講經濟環境感受嘅片，其中有一個人講，中國經濟係有潛力，只係大家無信心。後嗰句係啱，前嗰句唔敢苟同，因為負債規模，某程度上影響經濟潛力。自從2020年8月習近平提出3條紅線，中國樓市慢慢轉向，如果以當月作為基數100，按照70個大中城市房屋銷售價格每月按年升跌幅計算，去到2024年11月，新樓價格指數係87.5，二手樓得返32.5。
咁樣略估算，即係2019年起買大陸二手樓嘅人基本上輸緊錢。而家坊間都講緊中國會唔會陷入資產負債表衰退，簡而言之因為高負債導致個人或企業普遍地償還債務以增加儲蓄，而非消費或投資，進而導致經濟成長放緩或下降，發生經濟衰退。呢啲現象都喺消費品零售銷售總額，每月新增貸款，M1和M2數字逐漸體現出嚟。
所以大陸係咪真係要提高赤字率，再利用貨幣同財政政策去谷經濟？日本1985年簽廣場協定，當時政府債務佔GDP約66.7%，比現時大陸健康，但到2024年升到263.6%。而由1992年開始，直至2023年以現價計GDP先第一次出現5%增長，即呢30年後，以結果論日本QE似係終見成效，但30年先有成效，又係咪成功呢？
如果大陸真係面對資產負債表衰退，希望大陸可以更積極進行化債，去迎接一個更健康發展未來。美國能夠債台高築，因為美元重係全球重要儲備貨幣，大大緩衝佢印錢同債務成本影響。但人民幣仍未去到咁成熟階段，所以如果大陸真係做到化債，對國內經濟，對人民幣信用度都有極大正面效果。
金缸經
註：專欄作家言論不代表本網立場
密切留意BossMind動向！立即CLS