一個頭槌開齋，一個折射入波，曼聯喺英聯盃決賽以2-0擊敗紐卡素，新任主帥坦赫大半季以嚟調整陣容嘅心力，由呢個獎盃反映出嚟。曼聯（53.3%）、紐卡素（51.4）喺英超嘅平均控球率都超過五成，但今場決賽對碰，坦赫有別於以往強調拉開空間，透過不斷走位嚟製造更多傳球路線嘅做法，反而主動讓出球權，用更快嘅速度嚟完成進攻。
般奴費蘭迪斯先前幾季位置介乎八號、十號中間，承擔好多中場組織至關鍵一傳，呢兩part之間嘅連結。而域賀斯嘅加盟，令佢位置更貼近禁區，成為一個埋伏中鋒身後嘅影子前鋒。呢場波開局時，坦赫將般奴置於紐卡素中後線之間。後場傳比般奴嘅路線，由祖亞連頓、朗史達夫為首嘅中場群重點封阻，不過一旦劏開呢條線，紐卡素後防就要直接面對曼聯嘅快速威脅。
曼聯冬季買入擅於深度回撤嘅中鋒域賀斯，能夠緩解般奴喺人群之中接應嘅壓力。而域賀斯今場嘅作為，就係比作為梳爾喺後場出高波嘅Target-man，比般奴、拉舒褔特接應，迅速拉開紐卡素後場空間。
拉舒褔特唔只用速度撕開防線同直接入球，佢喺坦赫手下日漸進步嘅傳球功架，亦喺呢場英聯盃決賽發揮作用。而右路組合由換成更有活力嘅安東尼+達洛，更能重點針對速度較慢嘅紐記左閘丹般（Dan Burn）。
上半季英超比賽，曼聯只有對利物浦、曼城兩支壓迫力強嘅球隊，交出低於40%嘅控球率。而呢場決賽，坦赫深知威爾遜、祖亞連頓嘅干擾會為曼聯後場帶嚟麻煩，決定不如故技重施，最後同先前兩場英超大戰一樣收獲勝利，仲直接高捧加盟曼聯後第一個主要錦標。
防守方面，費特褪前一格，填補般奴壓上之後嘅中場空缺，防守時就作為中場第一線壓迫者，由卡斯美路擔任後方屏障。然而，呢個做法未能完全阻止主動搶攻嘅紐卡素喺曼聯後場製造機會，但喺阻止紐卡素埋門一腳方面就恰如其分。
白衫球員斜cut跑位再傳中，往往落得無人接應嘅窘境，比曼聯快速帶返上前場，再交比紐卡素重新進攻，週而復始。紐卡素全場15次射門，只有2次中龍，其餘射偏、被擋約佔各半，顯示曼聯門前防守令紐卡素射手冇辦法舒服射門，空有61%控球率，門前就無以為繼。
全世界曼迷都睇住坦赫點樣執呢隊波，而佢用唔夠一年時間就贏到獎盃，為球隊漫長嘅重建之路開個靚頭，亦係佢戰術成功嘅一個回饋。
留言 0