今年係SHE出道17周年，SHE三人再度合體發布紀念單曲《十七》，還原17年前初出道嘅造型，令一眾fans大呼懷念啊！
而琴日佢哋就舉行音樂會慶祝出道17年，喺獻唱《美麗新世界》嘅時候，Ella仲帶埋仔仔勁寶登場添啊！Selina同Hebe都勁驚喜！
呢次係勁寶首次喺公開場合亮相，不過只得1歲半嘅佢一啲都唔怯場，盡得媽媽Ella真傳，好有舞台風範，連媽咪Ella都大讚係神童！
Ella就話佢有得到勁寶同意先帶佢上台，而兩位「阿姨」Selina同Hebe就母愛爆棚，不停咁同勁寶互動～
Selina同Hebe基本上都係蹲喺台上對住勁寶唱晒成首歌，因為歌詞真係超應景！
「我看見 你微笑像天使」、「我願意 陪在你的身邊」等每一句都好似同緊勁寶講咁，而SHE三人都不時將手指指向舞台前方，就好似歡迎緊勁寶「來這美麗新世界」咁，場面勁溫馨啊！
喺台上仲有唔少搞笑場面，勁寶似乎好鍾意Hebe個咪，唔止搶走佢，仲將支咪塞埋入口添，搞到媽咪Ella要抹返乾支咪上面啲口水，Hebe就話勁寶係唯一可以搶佢支咪嘅男人，好搞笑！
Hebe同Selina都話之前完全唔知勁寶會上台同佢哋一齊演出，Ella就話可以帶仔仔勁寶上台演唱《美麗新世界》，同歌迷分享呢個時刻，覺得非常感謝同感動，希望大家都可以好似孩子一樣用純真嘅眼界去睇呢個美麗新世界。
SHE三人喺演唱會熱唱多首金曲，包括17年前嘅出道曲《戀人未滿》，仲有大熱作品《Super Star》添！
Hebe話勁寶就係SHE生命嘅延續，好開心可以同大家分享呢份喜悅，相信歌迷見到17年前嘅少女陪伴大家走過青春歲月，如今成為母親，都會非常開心同感動！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0