Tiger@MIRROR重披拉丁舞比賽戰衣！被姨姨喉擒熊抱

邱傲然（Tiger@ MIRROR ) 在hmvod賀歲片《向西聞記新春SP：阿姨！我不想努力了！》中飾演一名任職舞廳的跳舞老師，由於後生靚仔舞技又勁大受闊太歡迎。今次Tiger大展拉丁舞，更特別穿上私伙的拉丁舞戰衣上陣，Tiger說：「呢件係以前比賽著嘅拉丁舞衫，入咗行後好耐冇比賽，好多年冇著過，今次拍戲有動機畀我著返呢件衫，感覺好奇妙。因為我係跳拉丁舞先有機會入行，再著返有啲搵返當年朋友嘅感覺。我一路咁多年都係咁瘦，仲啱著，冇特別肥，開心嘅。」

劇情指Tiger要教何啟華（Dee@ERROR）跳拉丁舞，其後Tiger為冧一名大粒墨闊太，都要瞇埋眼扮enjoy，任由對方熊抱，又要攬住對方跳，惟有幻想對方是個又年輕又跳舞叻的女郎，所以該女舞伴都要黐上大粒墨連戲。

面對三個不同對手跳舞，Tiger覺得同阿Dee跳拉丁舞的體驗最得意，「佢個人好好笑，同佢跳舞好多好笑嘢，擦出好多好笑火花；同啲姐姐級跳舞，因為佢哋係有跳開，所以拍攝過程有交流，拍得順利。至於同年輕嘅女仔跳舞，佢本身係舞者，但唔係跳開拉丁，喺好短時間跟排舞老師排，好專業好快上手，都拍得好順利。我最難忘係未試過俾咁多姨姨圍住，真係畢生難忘！」

其實Tiger在現場排戲排舞時，一眾扮姨姨的演員都猛叫他「Tiger仔」，又熱情邀影相，甚受阿姨歡迎。到正式拍攝時，一眾阿姨衝前擁住他畀花畀利是，真情流露。Tiger笑說：「鏡頭外都有影相，佢哋有跳開拉丁舞，我又跳開，可能惺惺相惜啩？現實中我未試過俾咁多姨姨圍住，戲劇上大家先咁喉擒啫。」