楊茜堯愛女3歲生日　鍾嘉欣驚喜返港送祝福

藝人楊茜堯（前名楊怡）以及羅子溢（前名羅仲謙）的大女「小珍珠」不經不覺已經3歲，日前二人就為愛女喺屋企舉行生日Party。見「小珍珠」以公主裙現身，眼仔大大兼剪咗瀏海嘅佢，非常靚女可愛，成功遺傳父母嘅良好基因。而最驚喜係鍾嘉欣攜同佢三名子女出席Party，同場仲有楊茜堯嘅家姐楊卓娜以及其女兒，眾人仲齊齊影大合照，場面溫馨。

而楊茜堯仲昔心佈置場地又為女兒準備靚靚生日蛋糕，氹得愛女非常開心。佢喺貼文感觸寫到：「三歲啦，眨吓眼珍珠妹已經長大了，而且還是一個公主迷，由蛋糕到公主裙，甚至底衫褲她都指定要公主造型，所以今年的生日派對造型也是她指定的。派對雖然簡單但温馨，謝謝朋友們的參與，最開心係收到Auntie的信息，回港就立即來看我們，同心心一齊慶祝，謝謝你姊妹，時間雖短，但回憶滿滿的。珍珠，爸爸媽媽祝福你身體健康，每一天都幸福快樂像小公主一樣，無憂無慮，我們所有人都很愛你。」

東網網站 : https://on.cc/東網Facebook專頁 : https://www.facebook.com/onccnews/