黃心穎自揭遭舊公司阻開記招　感激途人打氣：冇人會過嚟鬧我

黃心穎四年前因「安心事件」事業插水，一度避走美國，她去年以創作歌手身份重新出發，去年底又與Rubberband鼓手黎萬宏（泥鯭）拉埋天窗，走出谷底的她接受電台節目《星光背後》的訪問今日（2日）出街，她重提當年事發後的心路歷程。

現年35歲的黃心穎2012年當選港姐亞軍後入行，一直備受無綫力捧，2019年卻爆出醜聞令事業一落千丈，節目中提到當時她的大家姐心美及爸爸備受追訪，亦未有埋怨她，黃心穎亦感觸落淚，更哽咽坦承對於影響家人生活一直感到極度內疚。而事發十日後，黃心穎就赴美國讀戲劇避靜長達8個多月，期間爸爸亦曾打電話責罵她，叮囑她做事要想清楚後果，不能再任性，而最後心穎則因三家姐生孩子終於決定回港。

節目中提到2019年4月醜聞爆出前，黃心穎其實曾收到風聲，她形容當時就像是待一個計時炸彈爆發，她坦言新聞曝光前曾想過輕生：「件事出街前，我其實有諗過我係咪要消失係呢個世界，之後有好多好朋友即刻到我屋企睇住我，但我個情緒都係好差，好似浮雲咁。」至於新聞曝光後至離港十日間，黃心穎因一直未親自正面公開回應而受盡批評，她首次披露原來遭舊公司禁止：「我好記得事發第一日，我有問過公司係咪都要開一個記招去道歉，但公司怕好多人鬧或者追問，所以當時就話唔好做住。」她坦言當時很想即時公開道歉，一度想直接落樓見記者道歉，但被朋友阻止：「之後有好多唔同新聞，我諗公司都傾向唔做記招，但係我覺得自己做唔到一個人，就不如離開香港。」

相隔四年，黃心穎去年以創作歌手身份發表多首新歌，不少都明顯描寫事發後至今的心境，在網上評價兩極，節目中被問到回港後在街上有沒有受過責罵，黃心穎則表示：「街上面從來都無人會過嚟鬧我，反而係有好多人走過嚟同我講加油！」她亦分享最近獲途人打氣：「最近放狗時，遇到一個女仔突然走嚟同我講，叫我唔好驚！果刻我反而很驚，點知佢同我講，話其實我已經見過我兩年，一直唔夠膽同我講野，佢好想同我講一聲加油，做女仔都可以好堅強！聽完之後，我即刻覺得個世界仍然係好美好！」