繼炎明熹又出事︱姚焯菲MV抄襲楊思琦？網民列兩點證撞橋

《聲夢傳奇》人氣王、「國民初戀」姚焯菲（Chantel）日前推出第一首個人單曲《原來談戀愛是這麼一回事》，新歌大受歡迎，MV上架短短2日已經突破40萬觀看次數，相比之下同樣係《聲夢》人氣王嘅炎明熹（Gigi）推出處女作MV時3日衝破30萬大關，似乎Chantel先贏一局，年尾嘅女新人之爭隨時跑出。

至於Chantel喺MV中化身「小魚仙」，獲網民大讚仙氣十足，不過有網民就發現其MV嘅造型、意境竟然似足另一位歌手嘅作品，對方更係港姐冠軍級數！有網民翻出藝人楊思琦於2019年推出嘅歌曲《愛的森林》MV，列出兩點同Chantel新歌MV相似嘅地方。

第一，楊思琦其中一套主要服裝，同Chantel一樣都係一字肩白色長裙，同樣玩露膊兼胸前有波浪花紋設計；第二，兩者同樣有海上漂浮嘅畫面，意境類近。網友就指兩者雖然感覺相似，但呈然方式完全不同，稱唔上抄襲，只係構思上不謀而合，不過就「錯有錯着」反而帶挈「前輩」嘅歌曲備受討論，亦有粉絲指Chantel仙氣不輸港姐冠軍！

東網網站 : https://on.cc/東網Facebook專頁 : https://www.facebook.com/onccnews/