【搵食CONY】日本過江龍一人火鍋店　主打新鮮時令野菜配靚肉

源自東京的「LE-TA-SU」（しゃぶしゃぶれたす），分店遍布澀谷、中目黑以及北海道札幌，走「一人火鍋」路線，主打新鮮時令野菜配和牛、豚肉、海鮮等食材，並帶來號稱「可細意品嚐」的湯底，吸引當地不少上班族、單身貴族及打邊爐愛好者，店外總會見到人龍。她們今夏正式進駐香港，雖然天氣熱辣辣，但CONY相信無礙一年四季都愛打邊爐港人的熱情。

餐廳裝潢延續日本店風格，以和式木材為主調，環境明亮整潔。店內設68個座位，「一人火鍋」來說有獨立爐具是基本配備，餐廳部分位更於枱中有帶來小間隔設計，減少單人食客的尷尬感又不會太侷促。

「LE-TA-SU」暫時引入了5款湯底，包括極・和出汁、昆布出汁、藥膳麻辣出汁、特選壽喜燒及胡麻擔擔出汁。選好心水湯底後，可以從10款套餐中揀牛五花、海鮮、五花腩等心水肉類，CONY推介大家選「LE-TA-SU套餐」，$105（200g）就可以嘆齊安格斯牛肩胛肉、豬肉眼及牛舌，夠晒滿足。最抵食的就要數「牛五花套餐」，$68食到150g牛香滋味。