陳蕾終於喺演唱會後推出第一首作品《五瓣玫瑰》，題材同風格都頗有驚喜，散播滿滿快樂能量。
「這一清早走進了 這個小鎮感覺新鮮 通街中古的服飾 似置身於霍格華茲」
歌詞好有畫面，以輕快入腦旋律，帶大家走一趟寫意之旅，彷似置身一個自由自在，遠離壓力嘅地方。懷舊建築風格，親切熱情嘅氣氛，享受住和暖舒適天氣，到處都聽到音樂同笑聲，令人感到幸福愉快，心曠神怡。
「幸有碰上 這一個慶典 繽紛也多姿 色彩更趣緻」
生活喺香港實在太緊繃，好似人人都要爭分奪秒去達到所謂成功，毫無喘息空間。往往要身在異地先可以放下一切包袱，懶理別人目光，盡情做自己真正喜歡嘅事。
其實開心可以好簡單純粹，唔駛大灑金錢，喺街上放慢步伐地走走，欣賞身邊美麗嘅大自然，聽下音樂，已經可以稍為放低煩惱。每個人都需要放空地休息嘅時間，世界尚有無數色彩繽紛嘅地方等待你探索。
「簡單快樂隨處播 到處亦能共跳探戈」
聽依首歌個陣無需咬文嚼字，只需放鬆投入喺歌曲氛圍，就算依刻未能夠出旅，都可以喺音樂中抽離一下，平靜思緒。聽完更會不自覺地哼起旋律，會心微笑，依個就係蕾子嘅感染力。而MV拍出一段貼地遊記，讓觀眾一同感受當地風情，有種普天同慶感覺。
「五瓣鮮花 編織到髮辮 為幸福的感覺加冕」
陳蕾近年嘅作品相對沉重，透過歌聲傳遞力量，將大家從低谷中拯救。今次《五瓣玫瑰》走出黑暗，單純地傳播快樂，相當有新鮮感，非常適合佢平日經常掛住笑臉嘅性格。未來希望蕾子出多啲依類作品，為樂迷喺苦悶日常中帶嚟一點甜。
「玫瑰花瓣 高灑到半天 落地一刻心也開了」
當被生活壓迫得疲倦無力時，不妨搵個機會比自己出走一趟，讓身心歇息，或者會對人生有另一番體會。
最緊要喺旅途中聽住依首《五瓣玫瑰》！
《五瓣玫瑰》陳蕾
作曲：陳蕾
作詞：陳蕾
編曲：Perry Lau / Adrian Chan
監製：Adrian Chan
「逐個小販一一點算了 各有各風格異人怪臉
大伯手執搗蛋的樂器 獻奏上一曲氣概萬千
女僕裙襬飄舞踢著腿牽手高唱歌
簡單快樂隨處播 到處亦能共跳探戈
幸有碰上 這一個慶典
繽紛也多姿 色彩更趣緻
五瓣鮮花 編織到髮辮
為幸福的感覺加冕
望見孩童 開心到發癲
高起舞翩翩 鼓聲裡對戰
玫瑰花瓣 高灑到半天
落地一刻心也開了」
▼Follow hkpopculturelover
Instagram: https://www.instagram.com/hkpopculturelover/
留言 0