毅行者2024結束，筆者與3名隊友花了近兩日在泥濘中完成，由於受打風影響，早已做好打水戰的準備，惟四方山大霧得伸手不見五指比爛路更難。
今次非筆者第一次參加毅行者，首次完成。之前計劃預期要面對很多變數。距離長加上隊制，較個人賽發生問題機率幾何級數上升。
首先第一定要多謝隊友。唔係四個隊友一齊完成，唔算真正完成毅行者。然後係所有以任何方式支持過我哋嘅朋友，義工，工作人員。
早已經有打水戰的準備，落雨影響唔大。反而有利降溫。
落雨引致爛地是意料之外，克服方法是用近似滑雪嘅技巧落山。
塞車時候候同前後左右傾偈，感覺上玩短距離的參加者對路況比較緊張，玩長距離的人似乎都會欣然接受。
路面狀況方面，應對路況是參加者的責任，是能力的考驗。賽會提供支援，而我認為今次賽事支援是足夠。
賽事大致上安排完善。我們是比較後慢的參加者，每一個站都有足夠的食水，飲品（雖然食物款式會少啲，但仍然有嘢食）。賽道上路標足夠，我完全沒有發生行錯路的情況。物理治療，中醫推拿，救護站資源非常充足，增加大家完成機會。
除了大家談及的路況，我覺得更難應對是大霧。令頭燈功效驟降，視野不清，在四方山曾搵唔到路，有數次曾經去到邊緣路段折返。
總結今年毅行者，大會公布完成率係近年新低，四人完成隊伍只係僅高於五成。非常慶幸可以四個人一齊完成。
100公里的越野活動，無論本地同海外都越來越多，但係要求四個人一齊先算真正完成，基本上就只有毅行者。
▼ Follow Weak Ends Here
Website: https://www.weakendshere.hk/
Facebook: https://www.facebook.com/weak.ends.here/
Instagram: https://www.instagram.com/weak.ends.here/
留言 0