資深演員秦沛愛女姜麗文（Lesley）與圈外男友柏豪原定於2020年舉行婚禮，但因疫情令計劃中止，當大家都以為佢至今尚未正式出嫁之時，原來佢已經偷偷「暪婚」一個月，今日（29日）晒出大批婚禮靚相，同大家宣布喜訊！
Lesley向東網透露，其實佢同老公之前已經簽咗字，但係一直未舉行婚禮同斟茶儀式，如今如願以償同屋企人搞咗一個細party，三月時已經喺香港搞咗個小型婚禮，只係「family only」，20幾人一齊低調行禮。Lesley被東網問到係咪準備生BB時？佢就回應：「順其自然！」
相中見老竇秦沛極開心，一頭白髮嘅佢笑到見牙唔見眼，眼瞇瞇咁接過一對新人嘅敬茶，秦沛望住阿女着婚紗嘅靚樣，眼中更係流露無限父愛。至於Lesley一身谷胸Low cut婚紗亦非常性感，大露心形胸及玉背，優雅又夠索。而四叔姜大衛一家人亦齊齊出席。
東網網站 : https://on.cc/東網Facebook專頁 : https://www.facebook.com/onccnews/