【盤點「生」女郎】鍾培生最冧！豪言包起紅館畀陳嘉倩報天氣

有「百億富三代」之稱嘅鍾培生，下戰書向林作擺下百萬擂台戰，全香港人一齊食花生！30歲嘅佢呢期最紅，雖然話林作抵打，但佢對女更有一手，喺自家個人頻道，真係好多女睇，有素人又有靚女藝人，陳嘉倩、陳婉衡、簡淑兒等……個個成為「生女郎」。

有財又有才，鍾培生自然受女歡迎，眾裏尋她，佢似乎最「愛」係陳嘉倩。喺佢同嘉倩BB嗰集短片中，仲講到明係對方粉絲，又有個宏大嘅志願，就係包下紅館，畀嘉倩BB報天氣！至於佢點形容嘉倩BB？一句：「佢係最接近天使嘅人類，亦可以話佢係最接近人類嘅天使！」真係聽到都肉麻！

「生女郎」唔嫌多，繼續數！佢就同「咪神」陳婉衡玩野外露營講心事，就係咁傳出緋聞。有傳鍾培生介入成為陳婉衡同男友分手嘅導火線，事後鍾培生話同對方拍完節目後冇再見面，未曾單獨約食飯，大家只是普通朋友。陳婉衡亦話佢哋嘅緋聞只係誤會。

Date女神真係樂此不疲！佢又約簡淑兒遊大澳；同《美選D.n.A》嘅崔菲嫣去西貢鹹田灣野餐，真係聽見都興奮！

東網網站 : https://on.cc/

東網Facebook專頁 : https://www.facebook.com/onccnews/