【阿叻VS阿澤】跟陳百祥港台論政 杜汶澤預告拒爆粗動武

杜汶澤和陳百祥（阿叻）明午4時半，應邀出席港台節目《視點31》，一齊談局勢論民情，此帖文一出，哄動全城，不少網民留言表示會準備定花生，甚至開定賠率等睇好戲。

阿澤今午在社交網轉發相關內容，並說：「首先，當收到利君雅嘅來電，我承認我係有啲緊張，因為佢始終係我偶像。

之後佢同我講想搵我做『視點31』，話討論嘅對象係幻想自己如果係警務署（處）長就一早開真槍嘅陳百祥，問我得唔得，我就話no喇！自己脾氣唔係幾好，怕影響到香港電台一貫健康、持平同中立嘅影像（形象）。

不過，雖然聽日唔係利君雅做主持，但係既然佢打得比（畀）我，我一定會支持佢。所以我應承咗，做呢個節目。更加要多謝陳生（阿叻）應約。

至於我睇到港台fb有好多留言，希望我會爆粗甚至動武，我應承咗利小姐，會以禮相待，唔會令佢孭鑊，大家可以死咗條心。

Oh by the way , 如果聽日警察4點想再開記招，我睇不必嘞（喇），因為，根本唔會有人睇。聽日（5日）四點半香港電台電視部吖嘛，收到，我應該唔會去錯咗隔離商台嘅。」

（即時娛樂）