洪永城結婚︱舊情人李佳芯陳炳銓分開到場

藝人李佳芯單拖到賀洪永城（Tony）結婚，問到是否到來順道「相睇」？她幽默表示：「冇好嘢啦，上面最好係洪永城，都畀梁諾妍成功私有化咗。」她又補充近期多了去喜慶場合沾旺氣：「可能陣間落嚟就有好消息。（近期多人追？）都係咁，有嘅，不過未有啱，隨緣啦。」

問到會否當洪永城BB契媽？她說：「好大責任喎，係就自己（生）啦。（做契媽咁認真？）係㗎，要陪佢玩，又要買玩具，反而自己嘅就天生天養，哈哈！（今日送乜賀一對新人？）利是咋，我好實際，但依家知道佢有咗BB，等公布性別我就買禮物喇。」其前男友陳炳銓則與男友人結伴而至，一對昔日戀人同場賀Tony，認真畀面。

另外，張振朗與女友楊偲泳拍拖到場，算是首度齊齊公開亮相。振朗全程緊張到滴汗，做訪問時愈講愈口窒，相當搞笑。問到他們會否趕進度？振朗說：「做嘢先，工作重要啲。睇怕我哋唔會有第2次（一齊見人），唔知會咁多人，我哋好低調。」問到楊偲泳會否「等」男友，她笑言：「睇吓點先啦！」

東網網站 : https://on.cc/

東網Facebook專頁 : https://www.facebook.com/onccnews/