叱咤2023｜91歲胡楓現身惹觀眾起哄︰我希望永不言休

《2023年度叱咤樂壇流行榜頒獎典禮》今晚（1日）7時在亞洲國際博覽館舉行，一眾候選歌手出場後先進行林家謙、鍾雪盈、黃梓樂及胡楓的演出環節。林家謙鋼琴伴奏，黃梓樂、鍾雪盈及胡楓3位不同年代藝人輪流出場分享感受及唱歌。91歲胡楓現身《叱咤》舞台，並唱了幾句《那有一天不想你》及《愛是永恆》，引來現場起哄。

他說︰「我入行70年，好鍾意演戲同唱歌，我希望繼續打破自己嘅紀錄，成為喺紅館開演唱會年紀最大嘅一個藝人。有人問我，咁多歌我鍾意唱邊首，我真係揀唔到，結果我揀咗1首，揀咗黎明嘅《那有一天不想你》。另外，又有人問，咁多歌，我鍾意邊一句歌詞，其實咁多歌有好多金句，結果我揀咗張學友嘅《愛是永恆》。1月18號係我92歲生日，我希望繼續我嘅演藝事業，永不言休。我希望有好多歌陪住我一齊生活。最後，我希望在座各位身體健康，生活愉快， OK嗎？」

（即時娛樂）