鄭伊健呢期真係忙到甩轆，除了要為下月的紅館個唱做準備外，更要為將於本周四（6日）上映的新片《深宵閃避球》做宣傳。已有一段時間冇拍戲的伊健，今次更專誠為新片獻聲唱主題曲《遇怪魔我識得變大個》㖭！
適逢昨日是伊健的55歲生日，新片導演應智贇就特別炮製了《遇怪魔我識得變大個》 的動畫版MV，MV大走日系漫畫風，跟電影的拍攝風格不謀而合，加上節奏輕快的歌曲，整個感覺非常熱血，不少網民聽完之後更表示歌曲令他們聯想起當年同樣由伊健主唱的《數碼暴龍》主題曲！應智贇更留言：「感謝監製們讓《深宵閃避球》呢件事發生，成就呢個故事。感謝《數碼暴龍》，讓童年嘅我相信呢個世界仍然有善良，埋下20多年後嘅呢條伏線。感謝伊健， 延續大家嘅童年，祝伊健生日快樂！」
《深宵閃避球》講述外展社工楊琦（周家怡 飾）主理「深宵體育館」 ，一直鼓勵不願歸家的少女們，凌晨時份來到體育館做運動；無奈管理層突然出現人事變動，隨即面臨閉館危機。在自稱資深教練的劉志聰（鄭伊健 飾）協助問題少女組成「粉青隊」，參加全港閃避球錦標賽：打贏就留館留人，打輸就執包袱走人！教練同8位隊員本身都各有煩惱，但呢一刻無得再退避，全情投入頂硬上，一齊領悟閃避球嘅真諦！
留言 0