立法會議員不時有花邊新聞，選委界議員尚海龍自上任以嚟都有唔少爭議，例如喺議會敲鑼被叫停。尚海龍自爆係「E人（外向）」，覺得自己嘅行為唔似昔日民主派咁誇張，但的確為有時沉悶嘅議會增添趣味，比喻「食完主菜食甜品」。
尚海龍今日同傳媒舉辦交流午宴，重提過去喺議會嘅搶眼行為，佢大爆例如有次著中東服飾去立法會，事先有同立法會主席梁君彥討論，決定唔好著入會議廳，但就喺會議廳外見記者，總結嗰陣跟特區政府去中東嘅考察成果。佢明白呢啲行為引起社會討論，但佢強調唔係想好似《東張西望》何生同何太咁出位，只係因為自己身為創科人，本身比較有創意，佢亦覺得無可否認呢啲行為幫佢提高咗知名度。不過，尚海龍就冇回應呢啲花邊行為會唔會影響連任。
冀邀請尚海龍教廣東話
今次嘅午宴係由西貢區議員張美雄幫手邀請傳媒出席，佢強調純粹幫朋友，叫大家唔好諗咁多。佢提到當區好多高才，將來希望同尚海龍多多合作。佢提到內地人學廣東話唔容易，大讚尚海龍廣東話講得唔錯，嚟緊想邀請對方為高才教廣東話，傳授心得。
原文刊登於 AM730
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)