有時食飯都未必下下想約人，享受自己一個慢慢食的話，銅鑼灣呢間新開嘅SOLO UDON就啱晒你，顧名思義，即係一人烏冬！
吧檯設計座位，全部都用隔板隔開，都有幾自修室感覺，隱私度高。如果坐正餐廳中央位置，師傅仲會拉開座位正前方嘅隔板為你送餐。
點餐亦係自助形式，門口自助點餐機落單，坐低scan QR code就搞掂。餐廳主打每日新鮮人手製作烏冬，選用100%北海道小麥麵粉，口感煙韌彈牙富小麥香氣，供應數款冷熱烏冬，包括雞白湯叉燒烏冬、蝦濃湯吉列蝦烏冬、咖喱湯吉列豬扒烏冬等，仲可以揀大細size添。
大推明太子溫泉蛋冷烏冬/$88起，烏冬有超夠凍嘅木魚湯半浸住，上面有明太子、紫菜碎、葱花同溫泉蛋，仲跟咗新鮮wasabi 撈埋落去唔會辣，反而多咗清新香氣，好食，想增加口感，仲可以用加啲天婦羅脆脆。
小食方面，必點櫻花蝦芫荽餅天婦羅/$48，芫荽控大愛。強勁芫荽香氣，加埋櫻花蝦嘅鹹鮮味道，兩樣加埋好夾，而且炸得香脆唔油膩，不知不覺就將成件食晒，所謂獨食唔一定係劣食，自己都可以好好享受一人之境。
地址：銅鑼灣登龍街18號V Point地下3號舖
營業時間：12pm-10pm
