啟德主場館 3月開幕啟用，44歲的謝霆鋒將成為亞洲首位在場館開騷的歌手，舉行兩場《Evolution Nic Live謝霆鋒進化演唱會》。演唱會消息一出，已出現撲飛熱潮，上月的信用卡優先訂購，門票隨即被秒殺。
相隔25年再開騷，不少粉絲都大嘆一票難求，網上就出現疑似「黃牛」放飛，門票被炒至17萬多一張，認真誇張。
霆鋒日前就與老闆楊受成博士、經理人霍汶希（Mani）與久未露面的四哥謝賢及拉姑團拜。楊博士更透露，霆鋒媽咪狄波拉（拉姑）都大呻冇飛：「阿拉姑都嗌晒救命呀！」。
被問到現在是否唔夠膽聽電話，驚人打去求飛，楊博士還直言「聽（電話）！點會唔聽！我話你哋登記先，到時如果有我就俾你。」至於會否加場，楊博士發揮幽默本色，「你知佢好有性格㗎，冇人可以叫到佢㗎，佢而家諗緊。」
對門票被炒高至六位數字，Mani就勸大家要理性購票，「大家咁支持霆鋒當然開心，但希望大家理性啲，唔好咁炒貴啲飛，同埋唔好幫襯黃牛。」