【突然缺席活動】又傳劉愷威楊冪離婚兩年 劉丹：多鬼餘！

最近結婚4年的劉愷威、楊冪又傳出婚變，有指疑似劉愷威新歡的富家女Britney，喺網站中爆出劉、楊已離婚兩年。

今日劉愷威嘅爸爸劉丹（丹爺），本來應該要同一眾《愛．回家之開心速遞》嘅演員，出席中秋活動，不過丹爺就冇出現，而公關則表示佢係因為突然有事而缺席，一度引起懷疑，以為佢係要避開個仔同新抱婚變傳聞，所以唔現身。劉丹今日回應傳媒，對於個仔劉愷威被大陸傳媒指疑似暗撻富家女Britney，有人覺得劉丹為咗避席所以今日唔出席活動，劉丹有啲勞氣咁話：「多餘，真係多鬼餘，我唔講啦！」問到點解唔出席活動？劉丹話：「我唔係成日出活動㗎，我今日有事咪唔去囉。」

另外，喺劇中飾演送水輝嘅許家傑，表示《愛》o依家已440集，而當知道會添食多100集（共540集）時，覺得好開心，佢表示同大小姐林淑敏感情線可以繼續發展落去之餘，仲透露高層曾勵珍都希望劇集可超越《真情》，不過最重要嘅都係睇丹爺：「最緊要精神領袖丹爺身體健康同肯繼續拍。」