北京環球影城終於9月中正式開幕啦！北京環球影城係全球第5個、亞洲第3個環球影城主題樂園，更係全球最大嘅環球影城，足足比日本環球影城大3倍！園內共有7大園區，包括「哈利波特的魔法世界」、「變型金剛基地」、「侏羅紀世界努布拉島」、「未來水世界」、「荷李活」、「Minionland」，仲有全球獨家嘅「功夫熊貓蓋世之地」，即睇內文各大園區介紹同入面嘅遊樂設施啦！
圖片來源：北京環球影城｜撰文：Sharon
北京環球影城於9月1日開始試業，總面積超過400公頃，有7大園區、機動遊戲同地標、80間餐飲及30間零售店，仲有兩間渡假酒店。而家同大家介紹下呢7大園區有咩好玩啦！
1. 哈利波特的魔法世界
全球多個環球影城都有「哈利波特的魔法世界」，當然唔少得北京環球影城！除咗霍格華茲學院城堡、斜角巷、青蛙合唱團、城堡夜間燈光慶典，仲有全新機動遊戲設施「鷹馬飛行」，大家就可以成為霍格華茲學院嘅學生，置身於魔法世界！
2. 變型金剛基地
變型金剛基地係北京環球影城獨家嘅園區，想追求刺激一定唔可以錯過「霸天虎過山車」，除此之外，仲有「變形金剛：火種源爭奪戰」、「大黃蜂迴旋機」同「變形金剛：傳奇現場」，可以同變形金剛一齊影相留念！
3. 侏羅紀世界努布拉島
侏羅紀世界還原努布拉島，有自驅式滑翔機「飛越侏羅紀」，想同恐龍有互動體驗可以玩「奇遇迅猛龍」，仲有水上設施「侏羅紀世界大冒險」！
4. 未來水世界
每個環球影城都有嘅未來水世界，會有勁刺激嘅水上爆破特技表演可以睇！
5. 荷李活
還原多個荷李活場景，可以了解特效電影嘅幕後過程。
6. Minionland
最受歡迎除咗「哈利波特的魔法世界」又點可以少咗超可愛嘅迷你兵團呢！北京環球影城更係會有「Minionland」，園區除咗可愛嘅Minions場景，更有搞鬼生物車造型嘅騎乘設施、過山車等可以玩，大人細路都啱玩！
7. 功夫熊貓蓋世之地
最後一個園區「功夫熊貓蓋世之地」係北京環球影城獨家嘅園區，適合一家大細一齊玩，園內打造中國建築風格。
以後想去環球影城唔使去咁遠，可以近近地去呢個全球最大嘅北京環球影城啦！
【info】
北京環球影城園區
地址：中國北京市通州區梨園鎮
開園日期：即日起至9月19日（試業）/9月20日正式開園
留言 0