想學媽咪出道　沈月曾被同學排擠委屈轉學：好驚返學

一代性感女神邱淑貞大女沈月係公認嘅「最索星二代」，半隻腳踩入娛樂圈嘅佢原來喺風光背後，都曾遇上挫折，更令佢身邊難覓知心好友。佢坦言其實自己一啲都唔鍾意被人注視，性格內向嘅佢，因為由小學開始，就被媒體去校門蹲守，令佢感覺討厭，之後父母幫佢搵保鏢，點知適得其反令佢更突出，上到中學更因「星二代」身份遭同學排擠，成日被同學講佢屋企壞話，逼到佢要轉學，更令佢對學校有一定嘅排斥感。

沈月依家去到外國修讀日文和心理學，不過舊年因爺爺身體問題回港，之後就一直留喺屋企上網堂。沈月就直言自己好驚返學，因為即使去到外國都有人識佢，令佢好難交到朋友，同時又會遭遇外界不友善對待，搞到女神變宅女，寧願留喺屋企。

雖然如此，但原來沈月好鍾意唱歌跳舞，以後更想出道做藝人，或者選擇時尚方面嘅工作，因為佢好鍾意幫自己搞造型，佢又希望幫助孤苦無依嘅孩童，做一個志願者。

東網網站 : https://on.cc/

東網Facebook專頁 : https://www.facebook.com/onccnews/