柳應廷新曲MV中結婚　化90歲老妝哭出真眼淚

MIRROR成員柳應廷(Jer)剛推出今年度最後一首派台歌〈沒終點的青春〉，而MV亦都已經上架。今次為拍MV，Jer特別化了一個老妝，變身90歲老翁，而且亦有結婚場面，MV中感性的Jer更哭出真眼淚。

在經歷過月亮三部曲後，Jer今年的第四首作品〈沒終點的青春〉以成長、生老病死為課題，Jer說：「頭三首歌走入咗幻想世界，未必咁多人可以代入到故事，所以去到第四首，好想寫一首關於每一個人都經歷過嘅嘢。我有好多歌曲都鍾意講關於遺憾同失去、講人生中嘅錯過，今次喺製作歌曲時，同小克傾傾下就聯想到時間同生老病死嘅topic，講一個人由得到，到失去，再去到學懂放下嘅過程。」
Jer提到人生必經階段：「成長係一個你必須要面對選擇嘅一個step，例如選擇升學、就業，到讀完書選擇職業，又或者繼續追隨夢想；成長往往都係好殘酷去迫當事人去做一啲決定，你可能會因為呢啲決定放低咗一啲嘢，又或者選擇放棄夢想，係好殘酷。」

當中包括家庭責任、生活與生存：「有好多因素令到一個人冇咗以前後生嗰種純粹，以前後生好想做就去做，好想試就去衝，今次〈沒終點的青春〉某程度上係有少少提醒大家，要保持住年輕嗰種向前衝嘅心態，唔好俾生活或者成長去迫使自己呢個人磨平所有稜角，變成一個好純粹嘅社會齒輪。」至於Jer的最難忘人生階段則是畢業後的日子：「畢業後冇做嘢，攞咗兩年嚟全職玩音樂，係咪有好多成就？就冇嘅，純粹只係同朋友每星期夾3、4日band、出下show，學咗好多樂器，唱咗好多歌，自從嗰段時間就好鍾意唱歌，所以特別難忘。」
說到未來，Jer很想預視自己老來的模樣：「我都幾想睇下自己老咗係點，所以特登喺MV入面有一啲造型係俾我自己跳到去未來，睇下自己將來係點，預視自己將來老咗係點。呢個老咗嘅樣，我爸媽都未必接受到。對我嚟講係幾得意，好似一個實驗，俾自己睇下自己老咗個樣會係點，又或者俾fans睇下我老咗會係點。」MV講述男主角在臨終經歷人生走馬燈，回想起多個人生重要片段，當中不少情節都很寫實，Jer更因此觸動了感性神經，在片場哭起來：「MV有一幕講我爸爸走咗，我要俾媽媽一個好溫暖嘅擁抱，場面有少少傷感，因為我拍嘅時候好代入到個故事就喊咗。喺現實生活你唔會想有呢個情況出現，但MV現場就覺得好似真係發生緊，所以好難忘，又感動。」

Jer在〈沒終點的青春〉親自飾演男主角，結果要扮演一位90歲的老翁，他亦因此嘗試了特技化妝：「化老妝用咗好長時間，試妝都用咗4個妝，真實化妝用咗4個鐘，事前更抽咗一日去倒模自己個樣，都真係花咗好多時間。出到嚟見到自己特技化妝嘅老樣係好真實，原來自己個樣老咗係咁樣。好多謝化妝師用咗好多心機同時間去研究點樣做到一個好似嘅老樣，都做得好好，再加埋服飾，覺得自己好似變咗一個8、90歲嘅伯伯。」