陳柏宇又派新歌《命盡頭》，一聽歌名就明白，想講人生有好多條出路，做人唔好怕宿命，要對抗找尋出口。
陳柏宇仲用咗「地獄論」來講人面對困境時會轉牛角尖，「人生有大把路行，唔可以Over咗，話每次都係地獄，實情係你未經歷過，但如果走唔返出嚟，嗰個就係你地獄。」Jason表示，他都有想過哪些經歷會令他有如走進地獄，那時候他即想到女兒Abigail，仲幻想如果女兒唔喺度，會點？「例如我死咗個女，嗰個就係我地獄，但我好理智，我幻想會俾自己沉淪個零月，嗰個月可能會劈酒，但最終會接受到。冇人可以行過嚟同你講：『你唔好咁啦！』冇人可以咁做，只能夠靠你自己行返出嚟。你要俾自己合理時間去哀悼，夠了就要重回正軌，重新上路。」
呢個不一樣的老竇真係大吉利市，不過佢嘅諗法其實好正向，只係舉出例子希望大家思想要正面，遇到難題唔好諗埋一邊，佢仲自編自導自演一條短片，特別以「地獄論」作出發，講述Jason在死後如何不放棄，最終找到出路，死過翻生。Jason以浮誇的演技扮死，喜感十足。
至於《命盡頭》的ＭＶ，佢就冇出演，搵咗梁仲恆做主角，聯同香港傷殘青年協會傷青輪椅籃球隊及協同中學男子籃球隊參與演出，講梁仲恆在絕望盡處因運動再次重燃昔日鬥志，活出生命，藉着帶出傷殘運動員的驚人鬥志，最終可把命運改寫。拍攝當日，陳柏宇仲到現場探班。
