per se加入新唱片公司後推出第一首作品《也許沒有未來神》，帶大家走出灰暗，療癒心靈。
「有太多東西發生 要強忍 世界的思想充斥灰暗」
生活喺依個高壓都市，到處充斥傷感與批評，太多事無能為力，彷似行屍走肉，感覺心靈被淘空。好似所有人都要走一條一式一樣，所謂「成功」但自己並不喜歡既道路。
每日總有一堆問題要面對，日間疲於奔命，為口奔馳，係到深夜先有時間稍為歇息，此時特別多思緒浮現，往往都係負面想法，情緒不斷湧出，難過無奈，思前想後依然搵唔到一個出口。
「個個倒模不算差 似廢話 世界的思想不許分化」
其實每個人都會對未來恐懼，幻想不同可能性，甚至太習慣悲觀地看待所有事，但說到底只係自尋煩惱。
未來何去何從我地無法得知，但是好是壞都有一半機會，與其因為擔心未知而煎熬，倒不如嘗試專注當下，先處理眼前問題，再尋找一啲舒緩情緒既方法，過好現在先會有未來。
「想得太多 太失喪 到處是錯 成長靠自覺」
好多時我地係自己選擇比社會枷鎖圍困，要擺脫的確唔容易，不過如果你敢於拿出一份懶理世界既勇氣，目光放遠，走多一步，或者會發現另一片天空。漆黑中定會有星星照亮天際，世界尚有好多美好事情等待你發掘。
即使未來無神嚟打救，人生亦唔會一帆風順，但以往你都曾經靠自己一雙手，渡過一個個難關，將來同樣可以，你先係自己既未來神。
「望向天際閃爍那束光 即使現實是未來重重難關未破 感到溫暖寄居於心窩」
依首作品昏暗中帶出滿滿正能量，夜晚靜靜地合埋眼專心享受音樂，細味歌詞，可以將一切壓力放低，為大家喺意志消沉，氣餒無力時帶嚟一點安慰。同時鼓勵大家拋低無法改變既過去，勇敢堅強地向前進發，昂首應付各種挑戰，闖過每個難關。
《也許沒有未來神》同per se去年推出既三首廣東歌我都超級喜歡，有種特別魔力，越聽越上癮，成功喺組合特色同大眾口味之間搵到平衡。
「晚空天空太黑 昏暗得 看見星星照耀凌晨 會傷心不強忍 都記得」
Sandy同Stephen既聲線由以往到現在都能夠溫暖地唱出力量，歌詞有意思又勵志，令人反思自身，帶出希望。縱然今日你仍然活在痛苦中，per se既作品會永遠在旁，陪伴你重拾生活動力。
加入新公司後，相信per se會作出各種新嘗試，令人期待。祝福兩位可以繼續愉快隨心地做好音樂，展現更多面向予廣大樂迷！
《也許沒有未來神》per se
作曲：per se
作詞：Sandy@per se
編曲：per se
監製：per se
「望見飛鳥展翅飛向那寬廣
這生命力用盡不下降
消失於 霧裡中力抗
大概呼吸間 尚有些未看
哀痛不作聲 可有聽到呼喊快窒息
大地像寂靜 耳朵繼續聽」
▼Follow hkpopculturelover
Instagram: https://www.instagram.com/hkpopculturelover/