《極地謎情》游學修謝幕感言：望「自己人」明白在港搞舞台電影環境不公 需「唔公平嘅支持」

【獨媒報導】由游學修與黃秋生主演的舞台劇《極地謎情》，昨晚（28日）踏入第23場演出。繼早前游學修謝幕時主動提到《未來音樂祭》告急，指無人想悲情行銷，但環境已很困難，望觀眾「就算唔買飛都好，都可以多啲理解」，游昨晚謝幕時亦提到，望大家明白現時在香港搞舞台劇或電影，「係需要一啲唔公平嘅支持」，「因為我哋本身喺一個唔公平嘅環境下做緊呢啲嘢」，又望大家作為「自己人」可以在不公平的環境下「一齊互相撐住大家」。黃秋生亦提到自己在灣仔長大，「我哋會堅持到最後一刻嘅，無論我哋幾咁困難都好，我哋都會堅持」，獲全場報以掌聲。

《極地謎情》昨踏入第23場演出，全場接近滿座。演出尚餘今明兩天最後兩場，黃秋生謝幕時發表感言，提到本來對最後兩場「我都好絕望㗎喇，都已經諗住（觀眾席）一個窿兩個窿」，原打算向觀眾說：「我哋呢啲呢，就喺灣仔長大嘅，喺灣仔長大呢，即係灣仔呢笪地方長大，我哋會堅持到最後一刻嘅，無論我哋幾咁困難都好，我哋都會堅持」，獲全場報以掌聲。

黃秋生其後問游學修「有冇嘢講」，游說「多謝大家囉」，黃續說：「你講得好好㗎你！」游早前於9月17日的第14場演出後，曾於謝幕時主動提到《未來音樂祭TONE MUSIC FESTIVAL 2023》告急，指沒有表演者或創作人想悲情行銷，但環境已很困難，望觀眾「就算唔買飛都好，都可以多啲理解」。

游今笑言上次「講得唔好」，沒有說出重點，指其重點是望大家對有時表演要「告急」有「多啲諒解、多啲理解」。游又認真說：「我想大家明白，其實而家喺香港搞呢啲嘢呢，舞台又好電影又好，各樣呢啲嘢，其實係需要一啲唔公平嘅支持嘅我覺得，因為我哋本身喺一個唔公平嘅環境下做緊呢啲嘢」，全場報以掌聲。

游續說，該種不公平的支持「唔係乞你錢，而係可能大家多一份理解」，而該份理解是源自大家明白該環境氣候等背後的不公平，會令做這些事情有難度。

游又表示：「就算大家真係移民喇、真係飛喇，或者唔暗錢喇呢期，『喂我自己都唔係好掂，點解要幫襯你』，呢啲嘢全部都明白，只不過係希望大家都明大家都係一個辛苦嘅環境，而呢一樣嘢就係可能所謂『自己人』，我唔知呢啲叫『香港人』定咩……（黃秋生高呼：『灣仔人！』，多人拍掌哄笑）……大家『自己人』係應該多一份係大家互相喺呢個唔公平嘅環境底下一齊互相撐住大家囉」，多人拍掌歡呼。

黃秋生其後打趣說：「唔緊要㗎，如果有人移民呢，我哋準備去 touring 㗎喇！」二人最後與導演陳淑儀和監製張珮華一同謝幕。