葉巧琳（Mischa）一直主力圍繞音樂發展，早前初次參演微電影《意外》，於昨日（3月30日）舉行的《微電影「創+作」支援計劃》頒獎典禮中，獲頒專業組「最佳微電影女主角金獎」，該片另獲頒「最佳微電影製作大獎銀獎」及「最佳微電影編劇獎」。
今次是Mischa首次演戲，沒想到「一擊即中」順利封后，她說：「非常之開心可以參與到一個咁好嘅作品，其實我睇緊頒獎嘅時候，見到最佳微電影嘅編劇係我哋得獎時，已經係超級地開心！因為我真係覺得個故事係好好，同佢最後有好多懸疑嗰啲，原來有咁多Surprise嘅，我覺得係一個非常好嘅劇本。」見到《意外》得獎，她更立即發短訊給自編自導自剪的Paco Wong（王慶南）恭賀。
Mischa坦言對得獎有少許期盼，但當聽到銅獎和銀獎的得主分別是Hana譚杏藍和邵音音時，覺得自己無緣奪金，當宣佈金獎得主時，可想而知Mischa到底有多興奮。「自己第一次去演戲，對我嚟講係一個好新嘅事情，所以真係冇諗過會得到金獎，真係好開心！同埋呢個金獎係真係好多人幫助我先攞到。收到劇本後，搵咗個acting coach Yem Yuen（袁綺雯），佢真係去幫我排，上咗兩堂，盡量去搵下點樣去演得好啲，個角色嘅action應該係點，個inner monologue應該係點，講每句對白裡面或聽人哋對白時個即時反應、個心底話應該點樣去諗，呢啲都有佢去guide我。」
Mischa強調，今次成就到得獎全靠Yem及Paco的指導：「我哋3個一齊去研究，中間個摸索過程都慶幸有佢哋兩個去幫助我，而喺成個電影裡面，其實Paco都一路會guide我去演得會好啲。
一直致力音樂發展的Mischa發現自己或許有更多可能性：「能夠攞到金獎，我覺得好似一個小小嘅承認，係個令到我幾開心嘅一個鼓勵，可能我除咗喺唱歌呢一邊，喺電影上有其他嘅發展。希望將來亦都有一啲機會可以拍到電影，都會係一個想去踏足到嘅一個層面。呢個作品攞咗3個獎項，我覺得我哋嘅努力係冇白費。」
