因拍無綫處境劇《愛．回家》上位嘅林凱恩，繼之前流出艷照後又惹是非，不過今次係佢室內設計師哥哥林祥晉惹麻煩。尋晚喺社交網討論區上，有人發出尋人啟事，指名道姓搵林凱恩哥哥、設計公司老闆及裝修判頭嘅林祥晉，話林祥晉本來搞緊北角同沙田兩個私人屋苑嘅裝修工程，但自本月19日之後，佢就突然消失，並指該2個單位嘅業主已報警。有指林祥晉亦拖欠裝修工人薪金，有網民話日前曾經出過尋人啟事，而出貼文唔夠1粒鐘，林祥晉有聯絡對方要求刪貼文，但之後又再度失聯無影。
林凱恩：我都未聯絡到佢
對於哥哥失聯一事，林凱恩接受東網訪問話：「暫時依家呢一刻，我都未直接聯絡到佢了解發生咩事，而哥哥結咗婚搬出去住之後，其實都係大時大節先見，另外，同哥哥從來都冇干涉對方做嘅嘢。如果真係有件咁嘅事 大家都係成年人 要負責番自己做嘅事，而我能夠做嘅就只係專心工作，好好照顧自己同媽咪！」
東網網站 : https://on.cc/
東網Facebook專頁 : https://www.facebook.com/onccnews/