《 那些我愛過的人》38歲火辣人妻陳自瑤 助黃翠如、連詩雅姊妹破冰

由林文龍、黃翠如、連詩雅、馬貫東、陳自瑤等主演嘅新劇《 那些我愛過的人 》於本周正式首播，除咗現任亞視副總裁林文龍搭黃翠如組合新鮮有驚喜外，戲中另一亮點就係飾演黃翠如同連詩雅姊妹嘅閨密、人妻兼人母陳自瑤著上透視通花泳衣登場，一雙白滑長腿搶盡風頭，唔少網友都話正！

撰文、圖片：東方新地

火辣人妻陳自瑤首集晒白滑長腿

索人妻陳自瑤（Yoyo）在首集播出後當晚，即喺 IG 加 po 當日水著全相向粉絲大派福利，輕輕側身躺在藤椅上大晒白滑長腿與美臀，睇到林子善都話流晒鼻血！雖然呢幕只得短短幾秒，不過 Yoyo 表示當時其實正值冬天，個個著晒厚衫大褸，只得佢著住泳衣，坐喺池邊拍攝凍到震！最後劇組為免佢凍病咗驚第二日開唔到工，特別刪走游水戲份咋！今次證明 Yoyo 嘅付出係有回報，因為唔少網民睇完都大讚，話佢係最索人妻兼人母！ 38歲身材依然弗到漏，Yoyo今次真係好落力幫手谷收視囉！

車禍非意外齊緝兇

兩年未有推出新劇嘅黃翠如，首次飾演單親媽媽角色，劇中丈夫因一場車禍被撞死，而腹中孖胎亦因意外兩個只能活一個。飽受喪夫之痛、獨自湊大腹中孩子之餘，又要接手照顧亡夫跟前妻所生嘅仔，呢個角色的確有難度！ 慘係翠如懷疑親妹連詩雅同自己已死嘅老公曾經有路，搞到兩姊妹擘面，不過連詩雅就堅持自己係清白，之後兩姊妹得到中間人 Yoyo 幫手調解，關係亦逐漸破冰。至於在同一車禍慘變單親爸爸嘅林文龍，將會同翠如愈走愈近成為知心友，二人以為命運安排下遇上第二春，點知相處過後發覺唔係咁簡單，雙方關係錯綜複雜愛恨交纏。