Tesla Model 3訂車收車案件重演

近日好多人都想買/已買/等收新版本Tesla Model 3，TG有同事都親身經歷過一次，真人真事，一文睇晒整個流程同注意事項。

Step 1：網上落訂

上Tesla官網揀啱心水型號（Standard Range Plus、Long Range或Performance）同顏色（白、黑、藍、灰、紅），就可以網上付款落訂，盛惠$1,000。注意，這$1,000訂金不得退款㗎。

Step 2：等電話

落訂後，會有Tesla員工call你確認個order，以後會跟你以WhatsApp聯絡，主要是提你要交甚麼文件（電子副本），包括：

– 身份證
– 住址證明
– 駕駛執照

如果打算一換一，就要追加：

– 舊車牌簿
– 行車證

Step 3：搞保險/上會

兩樣都要自己搞，同一般買車稍為不同，無營業員貼身幫你處理。Tesla有合作開的保險公司（Liberty Mutual）同財務公司（Orix Asia Limited），Tesla員工會經WhatsApp給你兩間公司的link自己作網上申請，當然你都可以搵自己的保險及財務公司。留意，去到這個step，如果你訂那部車就快/已經到香港，Tesla就會傳埋底盤號碼（VIN）給你，可以用來quote保險。

Step 4：一換一

絕～大～部～份人買EV都會一換一，這部份有兩個做法：一，將你部舊車交給Tesla，由他們幫你劏，再退返劏車錢給你。二，自己劏，將劏車紙交給Tesla。做法一的好處是乾手淨腳，但價錢會較低，所以如果不嫌周圍quote價錢麻煩，應該自己搵地方劏，收返多一點錢。留意，劏車紙還劏車紙，要連同牌簿攞上運輸署取消登記先算正式注銷，這個動作也可交由Tesla代勞，收手續費$200。

Step 5：留牌

不少人劏車都想留返個車牌號碼，咁就要於前往運輸署取消登記前做定手續（先留牌，再取消登記），價錢$560。之後去Tesla交文件時一次過交埋留牌紙給他們，這樣就會將車牌套入部新車到。如果你決定交部車給Tesla劏，他們都可以幫你處理留牌，加多$200手續費，即是$760。

Step 6：親身交文件

完成以上手續，就可以等WhatsApp，Tesla員工會約你去（九龍灣國際展貿中心地下33-35號舖）交文件。到時要帶定：

– 身份證
– 三個月內住址證明
– Cover Note

如果一換一，要帶埋：

– 舊車牌簿及行車證
– 劏車紙（如自行劏車）

Step 7：畀首期

文件交齊，如果你是上會的話，就要付首期喇。Tesla會經WhatsApp給你銀行帳戶同部新車的invoice，扣除上會價錢，就是要付的尾數。例如你買$33萬的SR＋，上會$28萬，首期即是$5萬。銀行入數、網上轉帳或者返九龍灣交支票都可以。搞掂send返個證明給Tesla就可以。

Step 8：等收車

跟住就是等，等Tesla及運輸署處理所有文件。當準備可以交車時，Tesla員工就會WhatsApp或打電話約你交車日子、時間及地點（青衣航運路38號招商局物流中心4樓），最早10am，最晏5pm，自己夾時間啦。如果無朋友車你去或者不想坐的士/Uber，Tesla都有shuttle接你的。攞車只要帶身份證，不過最好上去之前裝定個Tesla App，咁就可以慳返時間。提埋你，那裏電話訊號收得不太好（尤其是CSL），不過上到去都有wifi用嘅。