由「黑哥」姜皓文、宣萱、張慧儀及ERROR全員梁業（肥仔）、何啟華（Dee）、郭嘉駿（193）和吳保錡主演的ViuTV新劇《極度俏郎君》，於本周一（17日）開播後好評不斷，當中演技派大前輩姜皓文的表現更令觀眾有讚冇彈。
去到昨晚一集，一幕講黑哥飾演的江湖大佬「一疤」去茶餐廳飲奶茶的畫面更成功在網上掀起極高討論度！劇情講到「一疤」坐完20年監，出獄後第一次在茶餐廳飲第一啖奶茶，由奶茶上枱一刻開始「一疤」表現激動，先雙手扶住張枱，再用一對金睛火眼全方位細看奶茶的「美態」，之後用鼻聞一聞杯奶茶，「一疤」開始眼紅紅，再慢慢拿起奶茶細味一口，「一疤」即時忍不住流下男兒淚，更激動喊住起身捱住個雪櫃，再走到街上轉幾個圈，最後碌在地上大叫「好飲到我講粗口啊」！
黑哥這幕「飲奶茶」戲碼真的隔住個芒都感受到杯奶茶有多好味，網民亦大讚「一杯奶茶你可以演到這樣。喜歡看你的戲是有原因的」、「呢場睇到我都眼濕濕。黑仔哥哥，我想講你知我為你放棄咗馬國明黃嘉樂」、「係電視台度睇到呢過層次嘅演出，太奢侈… 讚」，ViuTV亦有在官方Facebook更搞笑留言：「一聞二飲三喊四碌地，想形容杯奶茶有幾好飲？新晉 #奶茶kola.k.a #奶茶關注組頭號猛人一疤話你知」。
不過亦有網民批評黑哥飲奶茶飲到瞓地的演技太誇張，亦有人指「本來去到感動到眼濕濕已經好夠，轉頭瞓埋響條街度就多咗啦！成年事突然間好膠」。
