李駿傑 Jeremy@Mirror推出最新單曲〈唯美本尊〉，誓要打破過去歌曲風格，更以Band Sound唱出尋找最靚自己、做自己的態度。歌曲更得到兩位朋友邱鋒澤及Serrini的加持，而Serrini 更於MV中驚喜登場，就連Jeremy自己本身都不知道而被驚嚇到呢！
今次〈唯美本尊〉呢首歌嘅出現，其實要多得邱鋒澤，Jeremy透露：「邱鋒澤聽到呢首Demo，覺得好適合我，所以就將首歌送俾我，我聽完之後都覺得好正！好多謝佢俾到一首咁好嘅Demo我，又諗起我，所以我好開心。」過去Jeremy都未有試過製作Band Sound作品，但自己又好想嘗試，所以收到Demo後，他立即與監製王雙駿商量，而Carl叔叔當然是力撐Jeremy的想法，而且也覺得好啱Jeremy去做呢！
除了得到邱鋒澤送上Demo，Jeremy今次更找來Serrini為歌曲填詞，Jeremy道：「個人演唱會同Serrini合作後，一直都想搵個機會真正合作，直到〈唯美本尊〉呢首歌嘅出現，我同Carl叔叔傾時都覺得Serrini好適合寫呢首歌，而Serrini佢都好好應承咗我。」Serrini十分愛錫Jeremy，除左幫他填詞外，她亦有份客串MV，但製作團隊特別為Jeremy炮製驚喜，事前與Serrini夾好保密，直至Roll機一刻，Jeremy要演出開門一下，佢先知道Serrini出現。Jeremy起初還要強裝鎮定繼續演戲，但最終都忍不住露出驚喜的表情，狂問點解點解。
鏡頭外，Serrini亦貼心向Jeremy透露自己填詞時嘅想法，令Jeremy能夠更了解歌曲。其實〈唯美本尊〉希望帶出，好多時候好多事情我地都不能改變，當遇上放負嘅人、事或能量，我們要學習忽略佢地，然後嘗試尋回自己嘅舒適圈，去令自己更加自信地做自己，Jeremy更道：「好希望大家聽完之後，可以發掘返自己最靚嘅地方。」
為突出歌曲想法，在MV裡Jeremy飾演一位明星偶像，向來都是以官仔骨骨形象面對傳媒大眾，但其內心卻隱藏著一個狂野個性，一直都好希望展現不同嘅自己，所以今次妝容也十分破格，跟過去大家見慣的Jeremy截然不同，當中眼妝特別用上煙燻裝，眼底下亦加上很多閃粉，就連左耳都畫上銀色邊，Jeremy坦言十分喜歡化妝師今次嘅作品，更說：「呢個妝令到成件事有一種神秘感同靡爛感覺，同時亦帶出呢首歌嘅重點俾大家知：要搵到最啱自己嘅嘢，搵到自己最靚嘅嘢，呢一刻未必所有人接受到，但我覺得自己好靚，咁就已經好足夠。」
▼Follow 熱話HOTALK
Instagram: https://www.instagram.com/hotalk_hk/
Facebook: https://www.facebook.com/hotalkhk
留言 0