特朗普贏咗美國總統大選，首先要恭喜佢，因為偏向美國民主黨嘅媒體對佢從未停過抹黑、斷章取義、妖魔化，但偏偏呢堆媒體係大家以為最有公信力嘅媒體，無論美國內外好多人都睇呢啲媒體，佢勝選可以話係對呢啲虛偽媒體嘅反擊。
4年前，幾多所謂政評KOL同媒體，講到拜登勝選係「民主勝利」，結果呢4年搞埋啲Woke、DEI、自我認同呢啲添煩添亂嘅嘢，cancel文化盛行，唔夠左就會被批鬥，結果連美國人都頂唔順。至少呢度嘅小結論就係少睇啲無謂政評，佢哋分析係為咗令你啱聽，攞traffic攞engagement ，而且佢哋啲料都係嚟自民主黨媒，無自己發掘同分析，對受眾理解事件本質無乜作用。
講返經濟，大概預計下特朗普上任對大陸會有咩大方向。首先可以預期同佢第一次做總統差不多，都係繼續貿易戰。但睇返嗰陣雖然好似好大陣象，但大陸GDP喺特朗普任期內發生疫情前，基本上都保6，係2020年有個疫情先至升勢放緩。而且特朗普都唔係要整死大陸，只係維護本國利益，不停攞籌碼同你談判，博取最大利益。猶記得特朗普向大陸產品加關稅，大陸喺美國農產品入口上反制，最後根據傳媒2019年12月報道，「連同新一輪採購後，中國已買一千萬噸今年九月至明年八月銷售年度付運的美國大豆，規模高於去年同期的四十五萬五千噸。」可見其談判同解決問題能力。面對對手，特朗普反而有一絲仁慈，但拜登在位4年，對大陸合圍，陰乾，抽資，全部力度遠勝特朗普，如果賀錦麗當選，基本上都係延續拜登套路，香港先更難捱。
至於減息方面，可能都會繼續催鮑威爾減息，雖然通脹未完全受控，但美國經濟同就業唔係想像中咁好，特朗普可能為咗振興實體經濟，會爭取加快少少減息步伐。但都係嗰句，美國減息唔等於香港跟，上次美國減息，香港銀行即刻減，呢種配合，都好難相信係純商業角度出發，但確實香港減息水位都唔會太多。
美元方面，特朗普上次任期時都係偏弱，長期處於100之下，估計今個任期都差不多。美元弱啲，對香港嚟講，至少對現屆政府咁鍾意搞盛事經濟，熊貓經濟呢啲噱頭嘢，都多少少誘因吸引遊客。但鍾意去日本嘅朋友，唱yen就要睇時機了，弱美元未必咁易有平yen。
最後講下美股，大家都知美國升得急，道指標指PE約30倍，納指40幾倍，肯定唔平，但呢個音樂椅幾時完，肯定絕大部分無人知。有啲人陰謀論，話等特朗普上台後，民主黨會篤爆美股泡沫，呢個只能問民主黨，但借勢回調機會確實存在。
至於中美關係，對抗大勢已成，差在特朗普任內會唔會發生任何大型戰爭。猶記得拜登初上任，喺阿富汗撤軍一事，看似盡顯無能，但實際上佢就係想你咁認為，畀台階有心人發動戰爭，至少俄羅斯中計了，2年嚟喺烏克蘭陷於進退兩難局面。今次睇完成個選舉，感覺少咗好多上屆嘅鬼怪嘢，似乎大家都默認特朗普會係更好選擇。再加上特朗普第一次當選總統時，佢以不合外交常理嘅談判方式，令各國摸唔清底牌，反而大家唔敢輕舉妄動，嗰陣全世界好和平，係啲媒體日日寫到第三次世界大戰咁。希望特朗普可以繼續從經濟同外交雙管齊下，避免全球陷入全面戰爭。
戰爭有幾大機會發生，都喺投資市場反映出嚟，拜登退選，賀錦麗接力上，之後Lockheed Martin、RTX、Northrop Grumman全部爆上。但當賀錦麗敗象已呈，佢哋啲股價回得好快。咩人打咩算盤，我哋普通人唔知，但總有一啲人用最誠實嘅金錢話你知。
密切留意BossMind動向！立即CLS
留言 0