《誤判》幕後片爆甄子丹持續爆粗　撩吳鎮宇隻揪要呂良偉有驚喜

甄子丹主演及執導的電影《誤判》近日上映，早前電影就公開一段幕後製作影片，長達50幾分鐘，繼續由甄子丹由頭帶到尾，由爆粗捽爆劇組，到和同劇演員交流，再要客串的資深演員呂良偉、鄭浩南演出有驚喜，到最後語重心長希望帶動業界發展，完全表現出甄子丹大哥風範。

製作特輯影片中，甄子丹全程都極認真，火爆黑面爆粗場面不絕。先是要捽劇組流程︰「而家三點喇(凌晨)，唔該你哋快啲呀，唔係今日拍唔晒你哋就大X鑊！」亦提到作為導演的自己如果要求再拍，大家不用看Play Back浪費時間，極有權威：「將啲咁簡單嘅嘢，又複雜佢，講幾廿萬次又要排過晒！」氣場生人勿近。
就算是客串的呂良偉與鄭浩南，雖然比甄子丹更資深，亦難逃被捽爆，其中一幕甄子丹和幾位演員圍著，他就說：「究竟呂哥今次會點演，客串一日兩日咁短，畀觀眾有啲驚喜吖 ！你都係(指鄭浩南)點樣可以畀觀眾驚喜，我唔想大家嚟到好似……雖然係幫手，我唔想大家嚟到圍威喂咁，我搵你哋嚟，係希望你哋出彩！」

而同為主要角色的吳鎮宇，二人對戲亦好肉緊，甄子丹更叫吳鎮宇爆粗撩他隻揪：「最好睇就係吳鎮宇突然走埋嚟，X你老X，你好X好打呀？隻揪！然後佢係對緊甄子丹，觀眾睇到會笑。」
片場表現肉緊又火爆，影片最後甄子丹都和大家大和解，語重心長想為業界出一分力：「因為年紀大，我都唔係好想X人，因為自己都傷身……香港電影已經沒落，後繼無人，好難得有部大製作畀大家實習，畀機會去試，我們好嬲大家冇去珍惜……以後你會諗番起，甄生X你老X，咁X仆街，日日喺度鬧我，但我都希望喺有啲唔好嘅回憶，都諗番起，原來當初甄生都係想大家好，我相信呢部戲之後，大家都會提升咗一啲諗法或者創作空間。」甄子丹希望和他合作的演員朋友，以至劇組都可以從他身上獲益良多。