政Whats噏：假扮「市建局」電騙有後續　真市建局出招

油尖旺前區議員鄧銘心日前喺Facebook上話有「市建局」人員短訊約佢見面，因打錯名好快穿煲係電騙，估唔到仲有續集。鄧銘心今日（6日）就話自己嘅街坊彭小姐見佢喺大廈群組講假冒市建局嘅電騙故事，就即刻回應自己都有收到完全一模一樣嘅訊息，連名都無換。有關市建局嘅騙案頻生，真市建局都要出手，教大家點樣防範！

點解咁啱佢哋同時被騙徒盯上？原來彭小姐所在嘅大廈法團正申請緊市建局嘅維修資助，騙徒便以資助事宜為由展開套路，居民一見到係「市建局」信息，就以為同申請有關，一不留神就好易墮入陷阱，好彩今次無人中招。

話說不單止鄧銘心同彭小姐收到短訊，油尖旺區內好多法團都有申請資助，連市建局都發帖稱近日市面出現虛假訊息，以工作為由，要求會面約談，可見情況普遍，引起重視。

雖然電騙花樣百出，都可以見招拆招，市建局就出手，教大家點樣防範。不論係受重建項目影響嘅住戶和商戶，或各項樓宇復修資助計劃嘅申請人，均會收到由市建局發出嘅正式信函，內容列明專屬個案主任嘅姓名同聯絡方法。如果收到自稱是市建局人員嘅訊息，應先致電聯絡所屬嘅個案主任進行確認。

鄧銘心亦都出招，建議大家收到自稱政府人員嘅短訊就要警惕起來，若覺是可疑短訊立即Report and Block。

東網網站 : https://on.cc/東網Facebook專頁 : https://www.facebook.com/onccnews/