奧運破例讓運動員台上自拍 Samsung推出奧運特別版送選手

相信呢排香港人唔係關注M記嘅McGriddles，就係關注緊巴黎奧運㗎啦。今年香港嘅成績可以話係相當出色啊，喺支持香港運動員之餘，你地又有冇留意到今年有啲得獎選手包括何詩蓓，都係頒獎臺台上面拎住金色嘅機自拍呢？

其實呢部金色嘅機喺Samsung為運動員而訂制嘅Galaxy Z Filp6奧運特別版，Samsung由1988年日本長野冬季奧運開始已經係奧運贊助商之一，Samsung預先已經安裝好全套專屬服務同實用應用程式，再免費派發俾大約17,000位參賽選手。特別版用咗醒目嘅黃色點綴金色嘅奧運五環同帕運標誌，另外仲同巴黎精品男裝品牌Berluti合作設計主題式感應保護殻，保護殻採用Venezia皮革而成，仿效奧運五環鮮豔嘅配色，再結合獨特嘅古銅色調。至於規格配置就同普通版Galaxy Z Filp6完全一樣。

今次除咗係Samsung首次喺新品正式上市前提供俾運動員用 ，仲係奧運首次破例俾運動員帶Galaxy Z Filp6奧運特別版上台使用，因為過往奧運係禁止運動員攜帶手機等個人物品上台嘅，今次呢個安排除咗可以幫Samsung賣到廣告之餘，運動員仲可以喺台上紀錄低領獎嗰刻嘅喜悅同感動，真係一舉兩得啊！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/