我哋政府年年講嘅全民運動成效如何? 有目共睹! 反而一場世紀大感冒令全民覺醒，冚家跑步。亦因此，近年興起「social run」，簡言之，一班人約出嚟跑個步，之後飲飲食食吹吹水，理直氣壯嘅 happy hour，正吖 。熱潮發展迅速，由屋企附近，大街小巷以至港九新界各海濱長廊，自由約、網約甚至各大運動品牌嘅官方 social run，跑步識人媽屐婷，打卡出鋪是通識。小則幾十多則百九幾二百友，靚人靚場靚相唔少得，跑步頓變有型兼搶flo，星期一至七晚晚有!
有理由相信，今期主角 ~「Hash House Harriers」係 social run 始祖。
時間回到1938年，地點吉隆坡，起源極低能兼無聊，幾條終日流連酒吧嘅英國佬因擔心健康而決定每週相約酒聚加跑步，仲度咗句幾英式幽默嘅口號 ~「The Drinking Club with a Running Problem」。可能夠傻夠癲，又或舊世界夠純真，呢個唔知算跑會定酒會嘅咩會極受歡迎，神奇地擴散全球，且發展成有規模有組織嘅垮國飲跑食醉集團，粗略估計現時全世界有2,000個分會，遍佈中英美法日歐亞以至偏遠山旯旮。Hash House Harriers 於1970年傳入香港並正式成立分會 (難以置信嘅係佢哋竟然有商業登記，吹漲!) 早期鬼佬為主，至今陀地鬼佬各半 (Peter都係成員之一，唔怪得一日到黑掛住飲……) 且有數個分會之多，秉承傳統，依舊強調呢個唔係跑會，而係有跑步成份嘅酒會，同樣星期一至七晚晚有!
當然，只係飲吓酒跑個步又何需親身拜訪專題報道?! 以為簡簡單單跑幾k? 由玩法、會規以至內部架構均特立獨行自成一派你理得我。彷似離經叛道但家有家規；看似烏合之眾但亂中有序；以為無所事事其實無為而治!
真正想講嘅係，無 social media 嘅 run 仲係咪 social run?
香港嘅 Hash house Harriers 聚會，每週鐵定日子時間但路線神秘，跑幾k卻啤酒放題，你有你不屑但我有我宣洩，自得其樂，不亦樂乎。堅持低調唔宣傳，飛卜埃豬打卡出鋪? 咪煩啦! 呢班人只想於庸碌生活中，抖抖氣跑跑步飲飲酒吹吹水，天南地北胡說狗嗡，飲跑食醉過後迎接新一天。想加入? sor，並無正式加入渠道，唯熟人介紹或自己搜尋，indie 程度媲美牛頭角 metal band。潮流熱議話題先決嘅當下，你會驚嘆如此跑團竟存活於本地逾半世紀，不少年逾70嘅初代長老仍活躍於團中，笑看人生!
一個玩味咁重，跑少少飲多多嘅唔知咩會，對跑步稍為認真啲嘅跑友可以加入嗎?
佢哋 GM (General Manager) 咁答 :「Don’t join!」……..型到裂!
The post 尋找跑會的故事 #06 | Hash House Harriers．極可能係social run嘅始祖 appeared first on Fitz 運動平台.
留言 0