《看門狗》真人電影等待十年終開拍 《飢餓遊戲》Tom Blyth作主演

《看門狗》(Watch Dogs)呢隻game踏入第10年，期間已經出到第三代。其實喺2013年《看門狗》嘅開發商Ubisoft已經宣佈咗將會開拍真人版電影，但係講完之後就冇哂聲氣，而喺近日終於都聽到電影正式開拍嘅消息啦！

《看門狗》主要講述主角Aiden Pearce嘅姪女被謀殺，主角就試圖利用佢駭客嘅身份去搵出真相同報仇。電影自從宣佈翻拍成真人版已經超過十年，但宣佈完之後又冇再公佈任何消息，大家都已經就嚟冇咗回事，直至最近，Ubisoft終於喺官方X發佈《看門狗》正式開拍嘅消息。

根據目前嘅資訊，主角將會由曾經出演《飢餓遊戲》嘅英國演員湯姆布萊斯(Tom Blyth )，同埋出演《手靈》嘅澳洲演員蘇菲維特(Sophie Wilde)飾演，由《絕命空間》嘅克里斯蒂盧布朗(Christie LeBlanc)編劇，法國導演馬修·圖里 (Mathieu Turi)執導。暫時嘅資訊就係得咁多，亦未知幾時會上映。

本身呢套真人版電影會由Sony影業拍攝，後尾就轉咗手俾New Regency製作，但因為同樣由Ubisoft同New Regency共同出品嘅遊戲改編真人版電影《刺客教條》嘅評價褒貶不一，所以大部分觀眾都對電影版嘅《看門狗》冇乜期待，觀眾嘅期望值咁低再加上長時間嘅等待，睇怕今次製作方都要攞出百分之一百嘅誠意同實力，觀眾先會收貨啦！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/