蘇韻姿早前演出音樂劇《我們的青春日誌》番外篇《Nancy勞軍SHOW》，又跳又唱《浮誇》、《酷愛》、《越唱越強》等10多首歌曲。她自爆被《越唱越強》考起：「要演獨腳戲，心情超緊張，演出前一晚，我不停Loop啲歌，最難係《越唱越強》。我覺得自己越唱越弱，因為啲歌詞好密、節奏好快，好似急口令咁。我睇容祖兒演唱會，見佢唱得好輕鬆，但我唱就好難，覺得祖兒真係好犀利。」
在今次音樂劇《Nancy勞軍SHOW》中，蘇韻姿除了舞台演出，亦參與度橋及服裝統籌等幕後創作。她說：「其實喺2023年已經有呢套番外篇嘅構思，不過真要有晒劇本同排練，就3、4星期先開始，所以籌備時間都好趕。過程中最大挑戰一定係中文，好多歌詞同對白都好難背，加上難度好高，係成個騷一個人hold，如果唔記得台詞就冇人救自己，所以要好熟，同埋喺現場會同觀眾有啲互動，執生好重要，真係好大挑戰。」蘇韻姿好友黃碧蓮亦有到場，蘇韻姿笑說：「我哋大家中文都差差哋，我問佢會唔會睇唔明，佢話我都明，佢一定會明。」
蘇韻姿透露簽約新公司後，將在幕前有不同的嘗試及演出機會。她說：「嚟緊會同HOY TV有不同節目嘅合作，之前我同陳思圻就返咗大陸拍攝一個新年節目，我哋兩個接觸咗好多新年嘅傳統文化，感覺好有趣。」
（即時娛樂）