甄濟如21歲生日揭禾稈冚珍珠　圈中最強閨密圈曝光

「最強星二代」甄濟如自入行成為歌手後，成績與實力有目共睹，早前佢直言想擺脫「捧唔紅」嘅星二代魔咒，莫負父親甄子丹之名，熱血又有澎湃。今日（19日）21歲正日生日嘅佢，一過生日就即刻甫出大個女慶生相，有別往常大家閨秀斯文形象，今次佢罕有以超性感貼身晚裝示人，Low cut剪裁加上佢半躺床上嘅美態，有如天降尤物般，令人眼前一亮，同身為模特兒嘅媽咪汪詩詩一樣，擁極致迷人曲線，天生明星相。

佢晒出生日照後，唔少好友都立即留言祝賀，當中就包括同樣係被睇好嘅星二代、影帝任達華與琦琦愛女任晴佳即洗版式留言，指自己可以搶到頭一個回覆，又高呼「I love you」、大讚好友係「Hottie」等。估唔到原來TVB「星夢」兩大人氣小花炎明熹及姚焯菲都同佢係閨密，分別先後留言送祝福，姚焯菲亦留言稱甄濟如為「Love」，友情可見一斑。

東網網站 : https://on.cc/東網Facebook專頁 : https://www.facebook.com/onccnews/