平時去日本旅行，點都一定要行下outlet，依家去台灣都可以行日系Outlet啦！
台灣三井OUTLET PARK台中港即將喺12/12開幕，係全台灣首座臨海outlet，入面有成170間店舖同超過30間餐廳。
其實早喺上月月尾，三井OUTLET PARK台中港已經開始試業，當時僅兩日就吸引過萬人到訪，outlet內人頭湧湧。
話明日系Outlet，三井OUTLET PARK台中港成個格局都同日本嘅Outlet好似，分室內區同室外廣場。
Outlet有好多國際品牌例如Adidas、Nike、PANDORA、Columbia等等，亦有台灣潮牌包括STAYREAL、a la sha等，折扣由3折起，唔少店舖仲有開業優惠，滿足晒各位購物狂。
Outlet仲有全台灣唯一一間望到海景嘅誠品書店，為咗配合Outlet嘅海港主題，誠品書店特別定做咗貨櫃書架擺書，目的打造「收藏海洋的專門店」，蒐羅全台誠品最齊全的海洋書籍、兒童海洋繪本、海洋主題系列文具，以及海線城市特有的宮廟文化。
除咗購物之外，仲有餐廳同美食廣場俾大家醫肚，其中有12間日本餐廳更加係首度進駐台灣，包括米芝蓮一星拉麵店銀座篝、東京人氣法式吐司店Ivorish、大阪章魚燒名店心齋橋味穂、、鎌倉紅葉茶屋等等。
呢個Outlet另一賣點就係60米高海景摩天輪，一共有36個車廂，部分係透明車廂，可以飽覽台中港嘅景色。明年5月預計仲會有ASOBI SQUARE室內遊樂場開業添！
喺機場、台鐵、高鐵站都有公車直接到達，交通都算方便。而附近仲有港人遊台熱門景點高美濕地添，將兩個地方plan做一日遊都唔錯！
地址：435台中市梧棲區臺灣大道十段168號
以後去台中又多一個景點喇！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0